Ижтимоий тармоқларда «Самарқандда Божхона бошқармаси контрабандага қарши курашиш бўлими катта тезкор вакили қамоққа олинди» мавзусида хабарлар тарқалди. Давлат божхона қўмитаси ушбу хабарлар юзасидан муносабат билдирди.
Қўмита хабарида айтилишича, 2018 йил январь ойида собиқ божхона ходими С.З. Самарқанд шаҳрида жойлашган «Темир Сервис Плюс» МЧЖга қарашли ТИР паркига бориб, у ерда республика ҳудудидан транзит равишда ўтиб кетиши керак бўлган ва божхона назорати остида турган юк автотранспорт воситасини гўёки тезкор тадбир ўтказиш мақсадида олиб чиқиб кетмоқчи бўлган.
Бу Давлат божхона қўмитаси томонидан олиб борилган ички тезкор текширув ҳаракатлари натижасида аниқланган ва мазкур ҳолат бўйича хизмат текшируви тайинланган. Ўтказилган хизмат текшируви натижасига кўра, Самарқанд вилояти божхона бошқармаси собиқ ходими С.З. ўз хатти-ҳаракатлари билан бир қатор норматив-ҳуқуқий ҳужжатлар талабларини бузганлиги учун божхона органларидан бўшатилган.
Давлат божхона қўмитаси томонидан собиқ божхона ходими С.З.нинг божхона тизимидан бўшатилгандан кейинги ҳаракатлари устидан олиб борилган қўшимча тезкор кузатув тадбирлар натижасига кўра, 2019 йил 8 февраль куни Жиноят кодексининг 182 (Божхона тўғрисидаги қонун ҳужжатларини бузиш) ва 211-моддалари (Пора бериш) билан жиноят иши қўзғатилган ва тўпланган иш ҳужжатлари тергов ҳаракатларини олиб бориш учун ДХХ Тергов бошқармасига юборилган.Мазкур жиноят иши доирасида фуқаро С.З.га нисбатан 2019 йил 11 февраль куни қамоққа олиш тарзидаги эҳтиёт чораси қўлланилган.
Ҳозирги кунда фуқаро С.З.га нисбатан Жиноят кодексининг 182 ва 211-моддалари билан қўзғатилган жиноят иши жиноят ишлари бўйича Тошкент шаҳар судида кўрилмоқда.
Изоҳ (0)