АҚШда Миллий хоккей лигаси клублари ва ўйинчилари Хитойда тарқалган коронавирус сабаб ўйин клюшкалари тақчиллиги муаммосига дуч келмоқда, деб ёзади Boston Globe.
Таъкидланишича, лига ўйинчиларининг қарийб 75 фоизи Хитойдаги корхоналар томонидан тайёрланадиган клюшкалардан фойдаланади, бироқ коронавирус тарқалиши сабаб уларни мунтазам етказиб бериш узилиб қолган.
NBC Sports таҳлилчиси Пьер Макгуаернинг сўзларига кўра, Миллий хоккей лигаси клубларининг менежерлари унга ўтган ҳафта клюшкаларнинг етишмовчилиги ҳақида айтган. Ишлаб чиқарувчилар ушбу хабарни рад этмоқда, аммо вазиятдан хавотирда эканликларини билдирган.
Штаб-квартираси Нью-Ҳемпшир штатининг Эксетер шаҳрида жойлашган Bauer компанияси, шунингдек, унинг асосий рақобатчиси бўлган Монреалдаги CCМ компанияси ўз клюшкаларини Хитойда ишлаб чиқаради. GearGeek.com порталининг маълумотларига кўра, Миллий хоккей лигасининг 39 фоиз ўйинчиси Bauer, 36 фоизи эса CCМ клюшкаларидан фойдаланади. Лиганинг 1,4 фоиз ўйинчиси фойдаланадиган True Hockey компанияси ҳам ўз маҳсулотини Хитойда ишлаб чиқаради.
Мазкур муаммо таъсир кўрсатмайдиган ягона клюшка ишлаб чиқарувчи компания бу — Мексикада жойлашган Warriror компаниясидир. Унинг клюшкаларидан Миллий хоккей лигасининг 22 фоиз ўйинчиси фойдаланади.
Изоҳ (0)