Жанубий Кореяда янги турдаги 2019-nCoV коронавируси билан касалланган 28-бемор қайд этилди, деб хабар берди «РИА Новости».
Вирусни янги юқтирган бемор аввалроқ касалланган фуқаронинг 30 ёшли хитойлик аёл бўлди. У вирусни юқтирган бемор билан алоқа қилгани учун уйида карантин остига олинган эди. Текширувлар аёлда коронавирус мавжудлигини тасдиқлаган. Ҳозирда у Коян шаҳридаги касалхонага ётқизилган.
Қайд этилишича, мамлакатда коронавирусдан тузалган тўрт кишига уйга жавоб берилган. Шу тарзда ҳозир касалхонада 24 нафар бемор даволанмоқда, 865 нафари эса текширувдан ўтказилмоқда.
Хабарда айтилишича, ҳозирда Жанубий Кореядаги 124 та тиббий муассасада коронавирусни тезда аниқлаш усули амалиётга татбиқ этилган. Мамлакат бир кунда уч минг кишида ушбу вирус бор ёки йўқлигини текшириш қувватига эга. Бироқ биринчи навбатда касаллик аломатлари кузатилаётган ёки хорижда бўлиб қайтган фуқаролар текширилмоқда.
Жанубий Корея ҳукумати 12 февралдан бошлаб мамлакатга келган фуқаролар коронавирус ҳақида мустақил равишда консултация олиши мумкин бўлган мобил дастурни ишга туширди.
Ушбу дастур Хитойдан келган фуқароларнинг смартфонига юклаб берилади. Улар дастурга ўзлари ҳақидаги маълумотларни киритади, керак бўлган тавсияларни олади ҳамда 14 кун давомида саломатликларини ўзлари назорат қилади.
Маълумот учун, Хитойда коронавирус оқибатида вафот этганлар сони минг кишидан ошиб кетди. Мамлакат етакчиси Си Цзиньпин коронавирус тарқалишининг иқтисодиётга таъсирини камайтириш лозимлигини қайд этди.
Изоҳ (0)