Қашқадарё вилояти Чироқчи туманида қиймати 2,1 миллиард сўмлик пахта хом ашёси талон-торож қилингани аниқланди. Бу ҳақда «Дарё»га Бош прокуратура томонидан маълум қилинди.
Хабар берилишича, Бош прокуратура ҳузуридаги Иқтисодий жиноятларга қарши кураш департаментининг Қашқадарё вилоят бошқармаси томонидан «Чироқчи пахта тозалаш» АЖда терговга қадар текширув ўтказилган.
Аниқланишича, «Чироқчи пахта тозалаш» АЖнинг мансабдор шахслари ҳамда жамият катта товаршуноси Ш.Т. ўзларига ишониб топширилган умумий нархи 2,1 миллиард сўм бўлган 545,6 тонна пахта хом ашёсини ўзлаштириш йўли билан талон-торож қилган.
Мазкур ҳолат юзасидан «Чироқчи пахта тозалаш» АЖ мансабдор ва моддий жавобгар шахсларига нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, Қашқадарё вилоятининг Чироқчи туманида мол ўғирлашда гумон қилинган 32 ёшли эркак ИИБ ходимлари томонидан калтакланиши оқибатида 23 январь куни вафот этган эди. Кейинроқ ИИБнинг бошқа ходимлари ушбу жиноятни яшириш мақсадида гувоҳларга босим ўтказгани маълум бўлганди. Мазкур ҳолат юзасидан жиноят иши очилиб, икки нафар ИИБ ходими қамоққа олингани, уларга нисбатан жиноят иши очилгани ҳамда улардан бири ИИБ бошлиғи эканлиги ҳақида хабар берилган эди. Мазкур воқеалар ортидан Қашқадарё вилоят ИИБ бошлиғининг биринчи ўринбосари Самад Турдиев ўз лавозимидан кетган.
Изоҳ (0)