ИИВ ЙҲХББ ахборот хизмати 2020 йил 29 январь куни Matiz автомашинасининг капоти олдига осилиб қолган ЙПХ ходими ҳақида тарқалган видеога муносабат билдирди.
Хабарга кўра, жорий йилнинг 27 январь куни соат 10:00 атрофида Сурхондарё вилояти, Сариосиё тумани марказида жойлашган туман прокуратураси биносидан деҳқон бозорига ўтиш учун мўлжалланган пиёдалар ўтиш йўлагининг устида, Matiz русумли давлат рақам белгиси 75 U 967 DА бўлган транспорт воситаси ҳайдовчиси «Йўл ҳаракати қоидалари»нинг 91-бандида кўрсатилиб ўтилган талабларни бузган ҳолда тўхтаган.
Ушбу ҳудудга дислокация асосида хизмат олиб бориш учун бириктирилган Сурхондарё вилояти ИИБ ЙҲХБ ЙПХ отряди 2-сафарбар гуруҳи ЙПХ инспектори М.Тошпўлатов Matiz русумли транспорт воситаси ҳайдовчиси содир этган қоидабузарликни визуал кузатув орқали аниқлаган ва содир этган қоидабузарлиги юзасидан маъмурий баённома расмийлаштириш мақсадида ҳайдовчи томонга ҳаракатланган.
Йўл-патрул хизмати инспектори келаётганлигини кўрган ҳайдовчи маъмурий жавобгарликка тортилишини англаган ва жавобгарликдан бўйин товлаш мақсадида ходимнинг қонуний талабига бўйсунмасдан Matiz олдида турган инспектор устига ҳаракатлантиришни бошлаган ва ЙПХ ходими М.Тошпўлатов транспорт воситасининг капотига осилиб қолган.
Транспорт воситаси капоти устида бўлган йўл-патрул хизмати инспекторини кўриб била туриб ҳайдовчи Мирзо Улуғбек кўчаси бўйлаб тахминан 70 метр масофагача ҳаракатланган ва ЙПХ инспектори ерга йиқилиб тушган. Ҳайдовчи эса автомашина ҳаракатини давом эттирган.
ЙПХ инспектори М.Тошпўлатов бўйсунмай кетган ҳайдовчи бошқарувидаги транспорт воситаси тўғрисидаги маълумотни алоқа воситаси орқали бошқа ЙПХ инспекторларига етказган.
Олиб борилган тезкор ҳаракатлар давомида Сурхондарё вилояти ИИБ ЙҲХБ ЙПХ отряди 2-сафарбар гуруҳи катта инспектори З.Зокиров бўйсунмай ҳаракатланган ҳайдовчи бошқарувидаги Matiz русумли транспорт воситасини тўхтатган.
Ҳайдовчи, 1999 йилда туғилган, Сариосиё туманида яшовчи фуқаро Остонақулов Ёқубжон Ихтиёр ўғлига нисбатан Ўзбекистон Республикаси Маъмурий жавобгарлик тўғрисидаги Кодекснинг 194-моддаси тартибида баённома расмийлаштириб транспорт воситаси вақтинчалик жарима майдончасига жойлаштирилган.
Мавзуга доир:
Изоҳ (0)