Тошкентнинг Юнусобод тумани Ички ишлар бўлими инспекторлари маҳалла фаоллари кўмагида жанжаллашиб қолган опа-сингилларнинг тинч йўл билан келишиб олишига ёрдам берди. Бу ҳақда ИИББ матбуот хизмати маълум қилди.
ИИБ аёллар масалалари билан шуғулланувчи мутахассислари маҳалла фаоллари билан биргаликда нотинч оилаларни ҳар куни йўқлаб, зиддиятлар сабабини ўрганишни йўлга қўйган. Шу тариқа улар қайси оилага қандай ёрдам кераклигини аниқламоқда.
Жумладан, яқинда аёллар масалалари бўйича иш олиб борувчи инспекторлар «Йўлариқ» маҳалласида икки туғишган опа-сингил бир оилада, бир хонадонда яшаб бир-бири билан гаплашмаётганини аниқлади. Маълум бўлишича, улар болалар сабабли қаттиқ уришиб қолган ва 1,5 йилдан буён гаплашмай қўйган.
Инспекторлар ва маҳалла фаоллари бу икки аёл билан суҳбат ўтказди ва уларни ўзаро кечирим сўрашга ундади. Опа-сингил бир-бирини кечириб, ярашиб олди. Бунга сабабчи бўлган инспекторлар ва маҳалла фаолларига миннатдорлик билдирди.
Изоҳ (0)