Тошкент метрополитени Юнусобод йўналишининг янги қурилган «Шаҳристон» ва «Туркистон» бекатлари оралиғида поезд синови ўтказди.
«Ўзбекистон темир йўллари» АЖ матбуот хизмати хабарига кўра, поезд синови ўтказилиши ушбу ҳудуддаги узайтирилган йўналишнинг юқори қисми тайёрлигини билдиради. «Шаҳристон» ва «Туркистон» бекатларида якуний қурилиш-монтаж ва пардозлаш ишлари олиб борилмоқда.
Қайд этилишича, янги метро йўналишлари лойиҳани амалга ошириш жадвалига биноан қурилиш меъёрлари ва техник талабларга мувофиқ фойдаланишга топширилади.
Эслатиб ўтамиз, Юнусободда ерости метросининг янги қурилаётган қисмида 18 декабрь куни давомий ёмғир сабаб 250 метр куб тупроқ кўчиши юз берган, оқибатда олти киши ҳалок бўлганди.
Жамоатчилик бахтсиз ҳодисада масъулиятсиз мутасаддилар ва «байрамизм»ни айблаган эди.
«Менимча, бу воқеада ким айбдор эканлигини мен биламан. ‘Қурилиш 28 декабрда битказилиши керак’. Мана шу гап айбдор. Буюк қурилишларни нуқул Наврўз, Мустақиллик, Янги йилга битириш истагимиз айбдор... Умид қиламанки, станцияда ҳалок бўлган қурувчилар исми билан барелъэфлар ўрнатилади», — деб ёзди журналист Никита Макаренко. «Мусибат сабабчиси — шошма-шошарлик.
«Нега катта объектлар қандайдир санага битиши керак? Бафуржа, сифатли қилиб қурсак бўлмайдими? Ҳеч қандай метро, ҳеч қандай бино, ҳеч нима одам ҳаётидан қадрли эмас», — деб ёзганди блогер Фарҳод Файзуллаев.
Дастлаб «Ўзбекистон темир йўллари» «Юнусобод» ва «Туркистон» бекатларини 2019 йил охиригача фойдаланишга топширишга ваъда берганди. 2016 йилгача «Юнусобод» йўналишининг қурилаётган бўлаги сифатида метро хариталарида кўрсатилган узуқ-узуқ чизиқлар устида «Файзулла Хўжаев» номли бекат ҳам бор эди, аммо 2016 йили у лойиҳадан чиқариб ташланган.
Изоҳ (0)