«Дарё»да 3 февраль, душанба куни «Қашқадарёда бодикамера тақмаган ЙПХ инспектори ҳайдовчидан ҳужжат талаб қилди. Ҳайдовчи эса бунга эътироз билдирди» сарлавҳали хабар берилган эди.
Қашқадарё вилояти ИИБ матбуот хизматининг хабар беришича, мазкур хабарда берилган видеодаги воқеа 2020 йил 31 январь куни Қарши шаҳар Ислом Каримов кўчасида содир бўлган.
Маълум бўлишича, ЙПХ катта инспектори катта сержант Б.Файзуллаев шу куни соат 07:30 ларда ўз хизмат машинасини Қарши шаҳри томонга ҳайдаб кетаётган вақтида Damas машинаси светофорнинг тақиқловчи қизил чироғидан ҳаракатланиб келганлиги учун уни ўзининг автомашинаси билан тўхтатган.
Инспектор бош кийимсиз ва бодикамерасидан фойдаланмаган ҳолда Damas эшигини очиб, ҳайдовчига ўзини таништирмасдан, тегишли ҳужжатларини тақдим қилишни сўраган. Ҳайдовчи бодикамера йўқлигига эътироз билдирганидан сўнг бош кийимини кийиб, бодикамерасини тақиб келган ва Damas эшигини очиб ҳайдовчига ҳужжатларини тақдим этишни талаб қилиб, автомашина калитини олиб қўйган ва у билан қўпол муомалада бўлган. Ҳайдовчи эса ЙПХ инспекторига ҳеч қандай қоида бузмаганлигини, светофорнинг яшил чироғидан ҳаракатланиб келганлигини айтган.
«Мени қисиб тўхтатдингиз, Сизни бунга ҳақингиз йўқ, автомашина калитини ҳам олиб қўйдингиз, бунинг учун ҳам жавоб берасиз, бундай қилишга ҳақингиз йўқ, бу ишларингиз учун жавоб берасиз, мен тегишли жойга арз қиламан» деб, автомашина ҳужжатларини ЙПХ инспекторига тақдим қилганида у ҳужжатларни олиб, «Йўлнинг нариги томонига ўтасиз», деб ўзининг автомашинасига миниб йўлнинг қарама-қарши томонига ўтиб тўхтаган.
ЙПХ инспектори ҳайдовчи Д.Йўлдошев йўл ҳаракати қоидасини бузгани учун маъмурий баённома расмийлаштирган ва ҳайдовчини маъмурий баённома билан таништириб ҳайдовчилик гувоҳномасини маъмурий баённомага илова қилиб, қолган ҳужжатларини тўлиқ қайтариб берган.
Мазкур ҳолат юзасидан хизмат текшируви ўтказилиб, ўтказилган текширув давомида катта сержант Б.Файзуллаев хизмат фаолиятини олиб бориши давомида ИИВнинг меъёрий ҳужжатларида кўрсатилган талабларга риоя этмасдан, фуқаролар билан беписандларча қўпол муносабатда бўлиб, ўзининг интизомсизлини намоён қилиб, фуқаролар онгида ИИО ходимлари тўғрисида салбий фикрларнинг уйғонишига сабабчи бўлганлиги учун эгаллаб турган лавозимидан озод қилинган.
Изоҳ (0)