«Ўзтўқимачиликсаноат» уюшмаси Хитой визасини олиш учун аризалар расмийлаштиришни вақтинча тўхтатди. Бу ҳақда уюшма томонидан маълум қилинди.
Уюшма хабарида айтилишича, коронавирус инфекцияси билан касалланиш Ўзбекистон ҳудудида қайд этилмаган бўлса-да, бу вируснинг республика ҳудудига ҳам кириб келиш эҳтимоли юқори қолмоқда.
Уюшма ана шу вазиятни инобатга олиб, коронавирус инфекцияси бартараф этилгунга қадар Хитойга барча корхона ходимларининг ташриф буюриши ҳамда ушбу мамлакат фуқароларини Ўзбекистон ҳудудига таклиф этишни кейинга қолдиришни тавсия этган.
Маълум қилинишича, бундан ташқари, Хитой Халқ Республикасига кириш-чиқиш визаларини расмийлаштиришда уюшма номидан буюртма ва хатларни бериш вақтинчалик тўхтатилди.
Маълумот учун, мазкур уюшма таркибига айни вақтда 1800 дан ортиқ компания киради.
Эслатиб ўтамиз, 4 февралдан бошлаб Ўзбекистон ва Хитой ўртасидаги авиақатновлар вақтинча тўхтатилди. Аввалроқ Ўзбекистон соғлиқни сақлаш вазири Алишер Шодмонов хитойликларнинг Ўзбекистонга келишини вақтинча чеклашни таклиф қилган эди.
Шунингдек, дунёнинг бир қатор авиакомпаниялари Хитойга парвозларни бекор қилган. Кўплаб йирик компаниялар эса Хитойдаги заводлари фаолиятини тўхтатди.
Изоҳ (0)