Япония Мудофаа вазирлиги айрим йўловчиларнинг коронавирус билан зарарлангани туфайли карантинга олинган Diamond Princess саёҳат кемасидаги одамларга ёрдам бериш мақсадида 100 га яқин аскарлар жўнатишга қарор қилди. Бу ҳақда Киодо агентлигига таяниб, «РИА Новости» хабар берди.
Унда айтилишича, ҳарбийлар Токио жанубидаги Йокогама порти яқинидаги кўрфазда турган лайнерга озиқ-овқат маҳсулотлари етказиш учун жалб этилади. Унда дунёнинг 56 мамлакатидан келган тахминан 3 700 нафар йўловчи ва экипаж аъзолари бор.
Эслатиб ўтамиз, Diamond Princess саёҳат кемаси жорий йилнинг 20 январь куни Йокогамадан чиқиб, Кагосима—Гонконг—Окинава йўналишидан ўтиб, 3 февраль, душанба куни, қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган.
Япония Соғлиқни сақлаш, меҳнат ва фаровонлик вазирлиги 5 февраль, чоршанба куни, шифокорлар 10 кишида янги коронавирус сабаб бўлган пневмонияни аниқлаганини маълум қилган. Шундан сўнг кема икки ҳафта муддатга карантинга олинган. Қайд этилишича, вирус гонконглик йўловчи томонидан юқтирилган бўлиши мумкин.
Ҳукумат вакиллари томонидан хабар берилишича, вирус ташхиси қўйилган кемадаги барча йўловчилар Канагава префектурасидаги касалхонага ётқизилган.
Изоҳ (0)