Ўзбекистонда 2020 йилдан бошлаб пахта ҳосили учун давлат режаси ва давлат буюртмаси тизимидан воз кечилади. Ҳокимлар эса пахта масаласи билан шуғулланмайди. Бу ҳақда қишлоқ хўжалиги вазири Жамшид Хўжаев Халқаро пресс-клуб йиғилишида маълум қилди.
Вазирнинг айтишича, Ўзбекистон Президенти 4 февраль, сешанба куни, ўтказилган қишлоқ хўжалигида кластерлар фаолиятини янада ривожлантириш масалалари бўйича йиғилишда шундай топшириқ берган.
Жамшид Хўжаевнинг фикрига кўра, давлат буюртмаси билан экин экиш қишлоқ хўжалиги тажрибаларига зид ҳолат ҳисобланади. Унинг қайд этишича, давлат буюртмасидан воз кечиш, қишлоқ хўжалиги соҳасини трансформация қилиш бошланганини билдиради.
24 январь куни Президенти Шавкат Мирзиёевнинг Олий Мажлисга Мурожаатномасида Ўзбекистонда пахта ва ғалла учун давлат буюртмасини бекор қилиш режалаштирилаётгани ҳақида маълум қилган эди.
Президент иштирокида 4 февраль куни бўлиб ўтган йиғилишда кластерлар фаолиятини ривожлантириш, пахта ва ғалла етиштиришда давлат буюртмасини босқичма-босқич бекор қилиш масалалари муҳокама қилинган. Йиғилишда Президент соҳада давлат аралашувини кескин камайтириш билан бирга ҳокимларнинг режа ортидан қувиш ва мажбурий меҳнатга жалб қилиш амалиётига бутунлай чек қўйилиши ҳақида гапирган.
Йиғилишда иштирок этган қишлоқ хўжалиги вазирининг ўринбосари Баҳодир Холиқовнинг сўзларига кўра, Қишлоқ хўжалиги вазирлиги кластер ва фермерлар учун фақат сервис ташкилот вазифасини бажариши керак.
Вазир ўринбосарининг маълум қилишича, республика бўйлаб 4,3 миллион гектар суғориладиган ер мавжуд. 2023 йил охирига бориб бу ерларнинг 3,2 миллион гектари кластерлар томонидан эгалланади.
Республика бўйлаб фақат мева-сабзавот етиштирадиган туман ёки ҳудуд йўқ. Балки, ғалла ва мева-сабзавот етиштирадиган ёки фақат пахта ва мева-сабзавот етиштирадиган туманлар мавжуд.
Изоҳ (0)