Олий Мажлис Сенатининг 2019 йил 12 октябрда бўлиб ўтган ялпи мажлисида Ўзбекистон судьяларининг махсус кийими —мантия тавсифи ва намунаси тасдиқланганди.
Мамлакатда судьяларнинг махсус кийими тасдиқланиши халқаро тамойилларнинг миллий қонунчиликка жорий этилиши, суд ҳокимиятининг нуфузи ошиши, қолаверса, «Судлар тўғрисида»ги қонун талабини амалда ижро этилишини билдиради.
Ушбу қонуннинг 84-моддасида судьялар суд мажлисини махсус кийимда олиб бориши белгиланган.
Шунга мувофиқ, жорий йил февраль ойидан бошлаб мамлакатда фаолият юритаётган барча судьялар махсус кийим — мантия кийган ҳолда иш олиб боради.
Мантия фақат суд залларида кийилади ва уни сайёр суд мажлисларида кийиш тақиқланган.
«Дарё» мухбири Азизбек Абдувалиевнинг хабар беришича, мазкур қонунчилик ҳужжатларида белгиланган тартиб республикада биринчи бўлиб Фуқаролик ишлари бўйича Наманган вилояти суди тизимида жорий этилди. Вилоят суди раиси Абдураҳмон Сафоев илк бор мантия кийиб, оилавий низо билан боғлиқ биринчи инстанция ишини кўрди.
Маълумот учун, ўтган йили мазкур судда кўрилган фуқаролик низолари сони 2018 йилга нисбатан 862 тага ёки 6,4 фоизга камайди. Никоҳдан ажратиш тўғрисида келиб тушган аризалар 194 та, кўрилган ишлар 304 та, никоҳдан ажратилган ишлар сони эса 56 тага камайган.
Изоҳ (0)