Хитойдан олиб келинадиган ўзбекистонликлар Тошкент шаҳри ва вилоятидаги махсус жиҳозланган касалхоналарга жойлаштирилади

Хитойдан олиб келинадиган Ўзбекистон фуқаролари Тошкент шаҳри ва вилоятидаги махсус тиббиёт муассасаларига жойлаштирилади. Бу ҳақда Ўзбекистонда коронавирус тарқалишининг олдини олиш бўйича республика махсус комиссия йиғилишида маълум қилинди, деб хабар беради «Дарё»нинг ҳукуматдаги манбаси.

Қайд этилишича, мазкур муассасалар тўлиқ карантин талаблари асосида жиҳозланган. Хусусан, коронавирус диагностикаси воситаларининг зарур захиралари яратилган, керакли дори ҳамда дезинфекция воситалари, ускуналар, сарфлаш материаллари, шунингдек, шахсий ҳимоя воситалари билан таъминланган. Соҳанинг етук мутахассислари томонидан Ухань шаҳри ва Хитойнинг бошқа ҳудудларидан олиб келинган фуқаролар алоҳида назорат остида бўлиб, мунтазам тиббий текширувлардан ўтказилади.

Шунингдек, мазкур тиббиёт муассасаларида барча керакли маиший воситалар ва зарур озиқ-овқат маҳсулотлари билан таъминланади.

Жаҳон соғлиқни сақлаш ташкилоти тавсиясига асосан, коронавирус инкубацияси даврини ҳисобга олган ҳолда Ухань шаҳри ва Хитойнинг бошқа ҳудудларидан олиб келинадиган ўзбекистонликлар икки ҳафта давомида карантин остида сақланади. Ушбу вақт давомида уларнинг оила аъзолари билан учрашиши тақиқланади. Яқинлари билан фақат махсус телефон алоқаси орқали мулоқот қилиши мумкин бўлади.

Ўзбекистон фуқароларини Ухань шаҳри ва Хитойнинг бошқа ҳудудларидан олиб келиш учун чартер рейслар ташкил этилди. Ушбу чартер рейсларнинг дастлабкиси 4, 5 февраль кунлари амалга оширилади. Ўзбекистонликларни эвакуация қилиш бўйича чартер рейс Ухандан бепул, Пекиндан эса пулли бўлади.

Мазкур самолётларда Ўзбекистоннинг Хитойдаги элчихонаси буюртмасига асосан мамлакатда қолиб, фаолиятини давом эттириш истагини билдирган фуқароларга зарур антисептик ва дезинфекция воситалари етказилади ҳамда бепул берилади.

Хитойдан ватандошларни олиб келиш жараёнида барча санитария-эпидемиология талабларига қатъий риоя қилинади, йўловчиларнинг ҳар бири шифокорлар назорати остида бўлади.

Комиссия йиғилишида тегишли вазирлик ва идораларга ушбу вазифаларни ўз вақтида ва сифатли бажариш юзасидан топшириқлар берилди. Комиссия ваколатига доир бошқа масалалар ҳам атрофлича кўриб чиқилди, дейилади хабарда.

Аввалроқ Хитойдан 2 февраль куни 157 нафар ўзбекистонлик талаба қайтиб келгани ҳақида хабар берилган эди. Сўнгги маълумотларга кўра, Хитойда коронавирусдан 425 киши вафот этди, 20 мингдан ортиқ киши вирусни юқтириб олди.