Макао ҳукумати коронавирус тарқалиш хавфи туфайли барча казинолар фаолиятини икки ҳафтага тўхтатишга қарор қилди, деб хабар бермоқда Reuters маъмурий ҳудуд раҳбари Хо Иат Сенг баёнотига таяниб.
«РБК»нинг ёзишича, барча 49 казино ва шу турдаги жойлар ёпилади. Уларнинг ёпилиш санаси ва вақти кейинроқ келишиб олинади. Макао раҳбарининг сўзларига кўра, ёпиш шартлари казино эгалари билан муҳокама қилинади.
Ҳукумат Макаода 10-одам коронавирус билан касаллангани маълум қилингач шундай қарорга келган.
Macau News маълумотига кўра, у шаҳарда яшовчи 57 ёшли эркак бўлиб, 25 январь куни Гуанчжоуга келган ва шу куниёқ қайтиб кетган. Эртаси куни тана ҳарорати кўтарилиб, йўталишни бошлаган. 4 февраль куни унинг коронавирусга чалингани тасдиқланган.
Хитой соғлиқни сақлаш миллий комиссияси маълумотларига кўра, мамлакатда 3 февраль ҳолати бўйича 20 438 та коронавирусни юқтириш ҳолати қайд этилган.
Изоҳ (0)