“Rossiya O‘rta Osiyo mamlakatlari bilan ham chegaralarni yopishi kerak”. Jirinovskiy koronavirusning tarqalishi haqida

Rossiya Liberal-demokratlar partiyasi yetakchisi Vladimir Jirinovskiy dunyoda koronavirus tarqab borayotgan sharoitda O‘rta Osiyo mamlakatlari uchun Rossiya chegaralarini yopish taklifini berdi. Bu haqda u o‘zining Telegram kanalida ma’lum qilgan.

Jirinovskiyning aytishicha, bu borada hatto Xitoy ham O‘rta Osiyochalik xavfli emas.

“Biz uchun hatto Xitoyning o‘zi ham bunchalik xavfli emas — u yerga kirgan ham, chiqqan ham qattiq tekshiriladi, osiyolik qo‘shnilarimizdan esa qo‘rqish kerak. Ularning tibbiyoti ham, nazorati ham yaxshimas, ammo fuqarolari tinmay Xitoyga va Rossiyaga qatnaydi. Shuning uchun ham xuddi Xitoy bilan bo‘lgani kabi O‘rta Osiyo mamlakatlari bilan ham chegaralarni yopishishimiz shart”, — deb yozadi siyosatchi.

Jirinovskiy bu o‘lkalardan migratsiyani to‘xtatish lozimligini ham qistirib o‘tgan. Uning ta’kidlashicha, Rossiya iqtisodiyotiga jabr bo‘ladi, ammo odamlar omon qoladi.

Jirinovskiy o‘zining noodatiy, qolipga sig‘mas fikrlari bilan tanilgan siyosatchi hisoblanadi. Bundan avval u Sibirdagi yong‘inlar o‘rmon qo‘riqchilarining shtati keskin qisqarib ketgani oqibatida yuzaga kelgani haqida gapirgan bo‘lsa, Belarus va Ukraina davlatlarini Rossiya bilan birlashishga ham chorlagan edi. Jirinovskiy hatto Rossiyada prezident lavozimini tugatib, tegishli vakolatlarni davlat kengashiga berishni, uning a’zolarini esa har yili aprelda saylashni taklif qilgan.