2019 йил Қашқадарё вилоятида 261 нафар аёл жиноятга қўл урган. 67 нафар хотин-қиз ўз жонига қасд қилишга уринган. Бу ҳақда «Қашқадарё» газетасининг расмий сайти маълум қилди.
Нашрнинг ёзишича, ўтган йили вилоятда ўз жонига қасд қилувчилар сони 166 нафарни ташкил этган бўлса, шундан 67 нафари хотин-қизлар, 29 нафари эса вояга етмаганлар бўлган.
— 2019 йил вилоятдаги мавжуд маҳаллаларнинг 48 тасида жиноят содир этилмаган. 178 та маҳаллада эса жиноятлар сони ошган. Вилоят бўйича 417 та маҳаллада нотинч оила рўйхатга олинмаган бўлса-да, 301 маҳаллада улар сони ортган. Оилавий ажримлар сони 1507 тани ташкил этган, — дейилади вилоят нашридаги мақолада.
Нашр сарҳисобига кўра, вилоятдаги ҳар бир маҳаллада маҳалла раиси, хотин-қизлар масалалари бўйича мутахассис, профилактика инспектори ва унинг ёрдамчилари, маҳалла масъул котиби, жамоатчилик асосида фаолият юритувчи 8 та комиссия аъзолари, нуронийлар ва ёшлар бўйича ўринбосарларни қўшиб ҳисоблаганда 100 га яқин ишчи шу ишга масъул.
Маълумот берилишича, айни кунда вилоятда 768 та маҳалла фуқаролар йиғини фаолият кўрсатади.
Изоҳ (0)