Ички ишлар вазири бошчилигидаги ишчи гуруҳ томонидан Бухоро вилоятида ўтказилган ўрганишлар якуни бўйича Бухоро вилояти Ички ишлар бошқармасида кенгайтирилган йиғилиш ўтказилди.
ИИВ ахборот хизмати хабарига кўра, унда ички ишлар вазири, генерал-лейтенант Пўлат Бобожонов, вилоят ҳокими Ўктам Барноев, вилоят ва шаҳар-туман сектор раҳбарлари, жумладан, ички ишлар, прокуратура, солиқ, шунингдек, жиноят ва ҳуқуқбузарликлар профилактикаси учун масъул бўлган барча давлат ва жамоат ташкилотлари раҳбарлари иштирок этди.
Йиғилишда ҳудудларда содир этилган жиноятлар таҳлил қилиниб, хусусан, Қоракўл туманида қотиллик, тан жароҳати етказиш, босқинчилик, ўғирлик, ўлим билан боғлиқ йўл-транспорт ҳодисалари, безорилик каби жиноятлар сони ошганлиги, Ғиждувон, Бухоро, Қоракўл, Жондор ва Пешкў туманларида ёшлар томонидан содир этилган жиноятлар сони ўтган даврга нисбатан кўпайганлиги таъкидланиб, бу борада ҳамкорликдаги комплекс чора-тадбирлар дастурини ишлаб чиқиш ва амалга ошириш зарурлиги кўрсатиб ўтилди.
Шунингдек, танқидий-таҳлилий руҳда ўтган йиғилиш давомида вилоятнинг айрим ҳудудларида ички ишлар органларининг бошқа ҳуқуқ-тартибот идоралари ва кенг жамоатчилик билан ўзаро ҳамкорликда, ҳуқуқбузарликларнинг олдини олиш борасида аниқ ёндашув асосида тизимли иш олиб борилмаганлиги кескин танқид қилинди.
Хизматни ташкил этишда жиддий камчиликларга йўл қўйган Қоракўл тумани ИИБ бошлиғи О.Қурбонов, Бухоро вилояти ИИБ пробация бўлими бошлиғи Б.Асадов, Бухоро тумани ИИБ бошлиғининг биринчи ўринбосари Ш.Гадоев, Пешкў тумани ИИБ бошлиғининг ёшлар масалалари бўйича ўринбосари А.Солиҳов, Қоракўл тумани ИИБ тергов бўлинмаси бошлиғи Ф.Норов ҳамда 6 нафар профилактика инспектори эгаллаб турган лавозимидан озод этилди.
Бухоро вилояти ИИБ ҳуқуқбузарликлар профилактикаси бошқармаси бошлиғи Ж.Болтаев, Бухоро тумани ИИБ бошлиғининг ёшлар масалалари бўйича ўринбосари М.Мустафоев, Бухоро вилояти ИИБ 1-сонли жазони ижро этиш колонияси бошлиғининг тарбиявий ишлар бўйича ўринбосари Т.Абдуллаевнинг ҳар бирига интизомий жазо чоралари берилди.
Хабарда айтилишича, вилоят ҳокими Ўктам Барноев йиғилишда таъкидланган камчиликлар юзасидан фикр билдириб, келгусида ушбу йўналишдаги ишларни сифат жиҳатдан янги босқичга олиб чиқиш, жиноятчиликка қарши кураш ва ҳуқуқбузарликларнинг барвақт олдини олиш бўйича йўл хариталарини ишлаб чиқиш ва амалга ошириш юзасидан мутасаддиларга тегишли кўрсатма ва топшириқлар берди.
Изоҳ (0)