Telegram’dagi “Alimoff” kanalida Pekin aeroportida uch nafar o‘zbekistonlik talaba qolib ketgani xabar qilindi.

Foto: EPA

“Hozir menga Xitoydan talabalar chiqishdi. Ular 3 kishi. Xabar berishlaricha, Pekin—Istanbul—Toshkent yo‘nalishi bo‘yicha samolyotga bilet olishgan, ammo reys qoldirilgan va talabalarga pullari ham qaytarib berilmagan. Hozir 3 nafar yurtdoshimiz Pekin aeroportida pulsiz, umidsiz ahvolda o‘tiribdi. Bular:

  • Hakimov Ulug‘bek
  • Shafoatov Rustam
  • G‘afforova Nargiza

O‘zbekiston Tashqi Ishlar vazirligi, Xitoydagi elchixona vakillaridan iltimos qilib qolamiz, ushbu talabalarga yordam bering. Xitoydagi boshqa yurtdoshlarimizdan ham iltimos qilib qolaman, bolalar juda tushkun kayfiyatda. Hali ular juda yosh, oralarida qiz bola ham bor. E’tiborsiz, taqdir qo‘liga qolib ketishmasin”, — deyiladi xabarda.

TIV matbuot xizmatining xabar berishicha, O‘zbekistonning Xitoydagi elchixonasi ko‘plab mamlakatlar tomonidan Xitoy bilan aviaqatnovlar bekor qilinishi sababli Pekin shahri aeroportida qolib ketgan 3 nafar talaba – O‘zbekiston fuqarolari to‘g‘risida 2-fevral kuni OAVda tarqalgan xabarni tasdiqladi. Talabalar bilan aloqa o‘rnatilgan va diplomatlar muammolarni hal qilish bo‘yicha tegishli choralarni ko‘rmoqda.

Elchixona Xitoy hududida bo‘lib turgan va qiyin vaziyatga tushib qolgan fuqarolarga har tomonlama yordam ko‘rsatish hamda koronavirus (2019-nCoV) bilan bog‘liq vaziyatni monitoring qilish bo‘yicha tezkor shtab faoliyat ko‘rsatayotganini ma’lum qiladi, deyiladi xabarda.

Bog‘lanish ma’lumotlari:

O‘zbekiston Respublikasining Xitoydagi elchixonasi konsullik bo‘limi:

  • Aziz Xilvatov +86 138 1120 4471
  • Bobur Yaxyayev +86 135 1102 4242

O‘zbekiston Respublikasining Xitoydagi elchixonasi xodimlari:

  • Nuriddin Ubaydullayev +86 139 10 85 7245
  • Nodir Nurmatov +86 158 1047 7270
  • Shuhrat Umirov + 86 139 1175 4476
  • Rustam Nazarov +86 138 0122 1452
  • Akmalxon Olimxonov +86 185 0017 0040
  • Mansur Ibragimov +86 135 5220 7848
  • Sardor Sirojov +86 186 1812 9040
  • Avaz Kamolov +86 178 1070 2707

Hurmatli O‘zbekiston Respublikasi fuqarolari, sizlardan turli mish-mishlardan kelib chiqqan asossiz ma’lumotlarni tarqatmaslikni, his-hayajonga berilmaslikni va xotirjamlikni saqlashni yana bir bor so‘raymiz, — deyiladi xabarda.