Хитой коронавируси: Вирус бўйича 30 январь кунининг энг муҳим воқеалари

2019 йилнинг охирида Хитойда тарқалган янги турдаги вирус сабаб ҳалок бўлганлар сони 170 кишига етди. Хитойдаги бир неча шаҳарлар эпидемия сабаб ёпилди, мамлакатдан ташқарида ҳам коронавирусга чалинганлар аниқланди, деб хабар беради «РБК».

Бутунжаҳон соғлиқни сақлаш ташкилотининг маълумотларига кўра, жами 6065 киши коронавирус билан касалланган (уларнинг 5997 нафари Хитойда). Хитой соғлиқни сақлаш миллий комиссияси эса вирусга чалинганлар сонини 7711 нафар деб берган, бошқа мамлакатларда ҳам вирусни юқтириб олганлар сони қўшиб ҳисоблаганда 7894 кишини ташкил этмоқда.

Миллий комиссиянинг таъкидлашича, қарийб 82 минг одам текширилмоқда, уларнинг 170 нафари тузалишга муваффақ бўлган. Вирус оқибатида вафот этганлар сони ҳам худди шунчани ташкил этмоқда.

Россияда 2019-nCoV коронавируси билан касалланганлар қайд этилмаган. Россия ҳукумати раиси Михаил Мишустин Узоқ Шарқдаги Хитой билан чегараларни ёпиш бўйича буйруқ берган. Аввалроқ бош вазир ўринбосари Татяна Голикова ҳам кўриладиган чора-тадбирлар ҳақида маълум қилганди. Мамлакатда Хитой фуқаролари учун виза расмийлаштириш тўхтатилган.

Россия Соғлиқни сақлаш вазирлиги коронавирусга чалинган катталарни «Рибавирин», «Интерферон бета Иб» ва «Лопинавир/Ритонавир» дорилари билан даволашни тавсия қилган.

Хитойнинг барча провинцияларида коронавирусни юқтириб олиш ҳолатлари қайд этилган, вирусдан озод сўнгги ҳудуд Тибет эди. Касаллик аломатлари Финляндияда ҳам қайд этилган.

АҚШ Федерал резерв тизими раҳбари Жером Пауэллнинг фикрича, коронавируснинг тарқалиши нафақат Хитой, балки бутун дунё иқтисодиётига таъсир кўрсатади. Хитойдаги вазиятнинг ёмонлашуви компанияларнинг ёпилиши билан ҳам боғлиқ, бироқ коронавирус оқибатлари ҳақида ҳали гапиришга эрта.

Касаллик ўчоғи ҳисобланган Хубэй провинцияси ҳукумати даволанишни истамаган, шифокорлар ишига халақит берган ва вирусни қасддан тарқатган фуқаролар жиноий жавобгарликка тортилишини маълум қилди.

Бош вазир Абдулла Арипов 28 январь, сешанба куни, коронавирус бўйича йиғилиш ўтказган эди. Жиззахда ҳам коронавирус тарқалгани ҳақида гап-сўзлар тарқалган, кейинроқ эса бу шунчаки миш-миш эканлиги маълум қилинганди. Ўзбекистон Ташқи ишлар вазирлиги ўзбекистонликлардан миш-миш тарқатмасликни сўраб, коронавирусдан ҳимояланиш бўйича тавсиялар бериб, Ухандан Ўзбекистонга қайтган талабаларга зудликда ССВ билан боғланишни сўради. Хитойдан қайтиб келган бир гуруҳ ўзбекистонлик талабалар аэропортнинг ўзида ҳар томонлама такомиллаштирилган тиббий текширувдан ўтказилди. Шунингдек, Соғлиқни сақлаш вазирлиги коронавируснинг Ўзбекистонга кириб келгани ҳақидаги гап-сўзларни инкор этган.