Тожикистонда 127 ёшга тўлишига бир ярим ой қолган Фотима она Мирзоқулова оламдан ўтди, деб хабар беради «Asia-Plus».
Ашт туман фахрийлар кенгаши раиси Зафар Маҳмажоновнинг сўзларига кўра, Фотима Мирзоқулова сўнгги йилларда истиқомат қилган Шайдон туманидаги Даҳана қишлоғида жойлашган қабристонга дафн этилган. У билан видолашиш учун туман фаоллари ва қишлоқнинг деярли барча аҳолиси тўпланган.
«Фотима она жуда мулойим, хушчақчақ аёл эди. Ҳар йили бир неча бор туман раиси билан ҳолидан хабар олгани борардик. Шуниси эътиборга лойиқки, у ҳеч ҳам касал бўлмаган», — дейди Маҳмажонов.
Жамоат фаолларидан бири Холбиби Маркаеванинг айтишича, Мирзоқулова сўнгги уч асрни кўрган Тожикистондаги ягона инсон эди.
Фотима онанинг қизи 82 ёшли Роҳатой Қобилованинг сўзларига кўра, унинг онаси жуда хушмуомала аёл бўлган ва ҳеч қачон бекордан бекорга ғам чекмаган.
«Онам деярли бутун умри давомида ‘колхоз’да ишлади ва бошқалар билан бирга пахта терди. Доим бизга Собиқ Иттифоқ, Иккинчи жаҳон уруши ва ҳаётидаги бошқа ҳодисалар ҳақида сўзлаб берарди», — дейди Роҳатой Қобилова.
Фотима Мирзоқулова 1893 йилнинг 13 мартида Даҳана қишлоғида туғилган. Саккиз нафар фарзандни — беш қиз ва уч ўғилни дунёга келтирган. Невара, эваралари сони 200 дан ошиб кетган.
Изоҳ (0)