Туркманистон президенти бошқарувга лаёқатсиз деб топилса, унинг мажбуриятлари парламент раисига эмас, балки парламентнинг Олий палатасига айланиши кутилаётган Халқ кенгаши раҳбарига юклатилади. Бу ҳақда Гурбангули Бердимуҳамедов бошчилигида ўтказилган Конституциявий комиссия мажлисида маълум қилинди, деб хабар беради «Asia-Plus».
Амалдаги Конституцияга кўра, давлат раҳбари лаёқатсиз деб топилган тақдирда, унинг вазифасини парламент раиси бажаради.
Айни вақтда комиссия Конституциянинг янги таҳририни муҳокама қилмоқда, унга кўра, мамлакатда икки палатали парламент пайдо бўлади. Мажлис — қуйи палата, Халқ кенгаши — юқори палатага айланади. Шу сабабли президент вазифасини бажарувчи номзод ҳам ўзгаради.
Шунингдек, йиғилиш давомида Конституциядан қонунчилик, ижро ва суд ҳукуматининг алоҳида эканлиги қайд этилган 6-модда ҳам олиб ташланиши режалаштирилмоқда. Бу эса икки палатали парламентнинг ишлаши учун зарур дея изҳоланган. Бироқ икки палатали бошқа мамлакатлар Конституциясида (хусусан, Россия ва Ўзбекистон) ҳукуматнинг алоҳидалик принципи сақланиб қолган.
Халқ кенгаши парламентнинг бир қисми бўлмаса-да алоҳида мавқега эга эди. Мазкур орган Туркманистоннинг биринчи президенти Сапармурот Ниёзов даврида муҳим рол ўйнаган. Бердимуҳамедов президент бўлгач эса, Халқ кенгаши фаолиятини тугатиб, ўрнига Оқсоқоллар кенгашини тузди. Ушбу орган анча паст мавқега эга бўлган. 2018 йилда ушбу кенгаш ҳам тугатилиб, яна Халқ кенгаши тузилган эди.
Изоҳ (0)