Томск вилояти губернатори Сергей Жвачкин Причулим посёлкасида содир бўлган ёнғин оқибатида ҳалок бўлган 12 нафар фуқаронинг ўлимида электроқурилмалар эмас, балки мансабдор шахслар айбдор эканлигини маълум қилди, деб хабар беради «Vtomske.ru».
Эслатиб ўтамиз, 21 январь куни Причулим посёлкасида ёнғин содир бўлганди. Ёғочсозлик билан шуғулланадиган ишчилар гуруҳининг бир қаватли уйи ёниб кетиши оқибатида жами 12 киши — 11 нафари Ўзбекистон фуқароси ва бир нафар россиялик ёниб кетганди. Дастлаб ёнғин носоз электр қурилмаси сабаб юзага келгани тахмин қилинганди. Ҳалок бўлганларнинг барчаси ёнғин содир бўлган уйда рўйхатда турган. Уй эса инсон яшаши учун яроқсиз ҳисобланган.
«12 нафар инсоннинг ўлимида иситгичлар, электр тармоқлари ва ойнадаги панжаралар айбдор эмас. Инсонларнинг хавфсизлигини таъминламаган мансабдор шахслар айбдор. Айбдорлар исмини ҳуқуқ-тартибот органлари ва суд маълум қилади. Аммо ҳозирдан айтиш мумкинки, фожиага элементар хавфсизлик қоидаларига риоя қилинмаганлик сабаб бўлган. Бунга эса бизнес эгалари ва уларни назорат қилувчи органлар жавоб беради», — дейди Жвачкин.
Губернаторнинг сўзларига кўра, туманлар раҳбарлари ўз ҳудудларида нима содир бўлаётганидан бохабар бўлиши керак. Унинг таъкидлашича, уларда муҳожирларнинг иш ва яшаш шароити ҳақида маълумот бўлиши керак.
Мавзуга доир:
Эслатиб ўтамиз, Ўзбекистон Президенти Шавкат Мирзиёевнинг кўрсатмасига асосан ёнғинда ҳалок бўлган ва жабрланган фуқароларнинг оила аъзоларига ёрдам кўрсатиш мақсадида ҳукумат комиссияси тузилган.
Изоҳ (0)