МИБнинг Тошкент вилояти бошқармаси Аҳмаджон Турсунбоев жиноий иши бўйича 12 мингга яқин фуқарога етказилган зарарни қайтаришни бошлади. Бу ҳақда 28 январь куни МИБнинг Тошкент вилояти бошқармасида журналистлар билан бўлиб ўтган очиқ мулоқотда маълум қилинди, дея хабар бермоқда «Дарё» мухбири Мусулмонбек Иброҳимов.
Эслатиб ўтамиз, 2019 йил 28 октябрь куни жиноят ишлари бўйича Қуйи Чирчиқ туман суди Ўзбекистон тарихидаги энг машҳур молиявий пирамидани қурган чинозлик Аҳмадбой (Аҳмаджон Турсунбоев) ва унинг жиноий шерикларига (судланувчиларнинг умумий сони — 16) нисбатан жиноят ишининг тергов билан якунланган қисмини кўриб чиқиш бўйича учинчи суд ҳукмини эълон қилганди. Аҳмаджон Турсунбоевга Жиноят кодексининг 59-моддаси 8-қисми ва 61-моддалари тартибида тайинланган жазога қисман жиноят ишлари бўйича Тошкент вилоят судининг 2019 йил 20 майдаги ҳукми билан тайинланган жазосини қўшиб, узил-кесил ўташ учун 1 йил муддатга тадбиркорлик билан шуғулланиш ҳуқуқидан маҳрум қилган ҳолда 14 йил 3 ой озодликдан маҳрум қилиш ҳамда энг кам ойлик иш ҳақининг 400 баравари миқдорида 52 миллион 96 минг сўм жарима жазолари тайинланган эди.
Жиноят ишлари бўйича Тошкент вилояти судининг 2019 йил 20 май кунги ҳукмига кўра, Аҳмаджон Турсунбоев ва бошқаларга оид жиноят иши юзасидан дастлабки тергов даврида хатланган ва олинган чет эл ва миллий валютадаги пул маблағлари, бино-иншоотлар, автотранспорт воситалари ва заргарлик буюмларини сотувга қўйиш белгиланган. Сотувдан тушган пул маблағларини 11 700 нафар жабрланувчилар фойдасига жами 418 миллиард 293 миллион сўм етказилган зарарни қоплаш ва пропорционал тарзда тақсимлаш тўғрисидаги ижро ҳужжатлари бюронинг Тошкент вилояти бошқармаси иш юритувига юборилган.
Турсунбоевнинг жиноят иши бўйича 126 миллиард 708 миллион сўм, 12 миллион 580 минг доллар, заргарлик буюмлари ҳамда 29 дона кўчмас мулк объектлари, 8 турдаги автотранспорт воситалари ва бошқа мол-мулклар пул маблағлари етказилган зарар миқдорини қоплаш учун хатланган.
Мазкур мол-мулклар суд қарорига асосан сотувга қўйилиб, сотувдан тушган пул маблағларини жабрланувчиларга етказилган зарарни қоплаш учун пропорционал тарзда тақсимлаш белгиланган. Тергов давомида хатланган ҳамда мол-мулк сотувидан 146 миллиард сўм тушган.
Бюронинг Тошкент вилояти бошқармаси томонидан электрон дастур ишлаб чиқилиб ва уларга ундирилиши лозим бўлган маблағлар ҳақида маълумот жолаштирилди.
Ундирилган пул маблағлари 11 700 нафар жабрланувчига «Суд ҳужжатлари ва бошқа органлар ҳужжатларини ижро этиш тўғрисида»ги қонуннинг 80-моддаси талаблари асосида барча ундирувчиларга автоматик тарзда мутаносиб (пропорционал) равишда махсус дастур орқали тақсимланади. Яъни қанча пул берганига қараб тақсимот бўлади. Масалан, умумий тақсимот 30 фоиз бўлса, ким 100 миллион сўм берган бўлса, 30 миллион; ким 10 миллион берган бўлса, 3 миллион сўм берилади.
Ҳозирда дастур орқали тақсимланган пул маблағларини жабрланувчиларнинг пластик карталарига ўтказиб бериш ишлари бошланиб, қисқа муддатда қолган ундирувчиларга ҳам маблағ тушириб берилади.
Изоҳ (0)