Ўзбекистон Республикаси Марказий банки шарҳига кўра, 2019 йил давомида Ўзбекистон давлат бюджети харажатлари 2018 йилга нисбатан 37 фоизга кўпайган.
Қайд этилишича, қўшимча харажатлар ижтимоий ва инфратузилма объектларини қуриш ва реконструкция қилишга қаратилган давлат дастурларини амалга ошириш бўйича юзага келган.
Молия вазирлиги 2019 йил давлат бюджетининг даромадларини 2018 йилга нисбатан 38 фоизга ўсиб, 102,6 триллион сўмга, харажатлари эса 107,1 триллион сўмга етишини прогноз қилган эди.
Мавзуга доир: Ўзбекистонда банк тизимига ишонч ортгани маълум қилинди
Ўтган йилда асосий капиталдаги инвестицияларнинг ўсиш суръати 33,9 фоизни ташкил этган, уларнинг ялпи ички маҳсулотдаги улуши эса 37,1 фоизгача ўсган.
Инвестицион харажатларнинг ўсиши, асосан, тадбиркорлик фаолиятини ривожлантириш бўйича давлат дастурларини амалга ошириш, иқтисодиётнинг асосий тармоқларида ишлаб чиқариш қувватларини янгилаш ва таркибий ислоҳотларни, шу жумладан, қишлоқ хўжалигини молиялаштириш билан боғлиқ.
Таъкидланишича, истеъмолчилар талабининг ошиши кўпгина соҳалардаги иш ҳақининг сезиларли даражада ўсиши (давлат секторида 39 фоизга ўсиши), аҳоли реал даромадларининг кўпайиши (2018 йилга нисбатан 7 фоиз) ва хориждан пул ўтказмаларининг ошиши билан боғлиқ бўлган.
Изоҳ (0)