Бутун дунё бўйлаб авиакомпаниялар янги коронавируснинг тарқалгани сабабли Хитойга учадиган рейсларни бекор қилмоқда. Баъзи авиакомпаниялар ҳукуматлар талаблари ва чекловлари билан бу ишни амалга ошираётган бўлса, баъзилари эса компаниялар раҳбарияти томонидан Хитойга парвоз қилишга қўйилган тақиқлар сабабли мазкур йўналишдаги рейсларни бекор қилмоқда. Бу ҳақда «РБК» хабар берди.
Хусусан, дунёдаги энг катта авиакомпаниялардан бири бўлган United Airlines 1—8 февраль оралиғида АҚШдан Пекин, Гонконг ва Шанхайга учадиган 24 та рейсни бекор қилди. Буюк Британия Ташқи ишлар вазирлиги маслаҳати билан British Airways авиакомпанияси ҳам ушбу мамлакатга парвозларни тўхтатди.
Грузия ҳам 29 мартга қадар Хитой билан ҳаво алоқасини тўхтатди. Жанубий Кореянинг Air Seoul лоукостер авиакомпанияси худди шу йўлни тутди. Тайваннинг China Airlines авиакомпанияси 10 февралга қадар бир нечта рейсларни бекор қилди. Air Canada авиакомпанияси бир ҳафтада амалга ошириладиган 33 та рейснинг бекор қилинишини маълум қилди, Германиянинг Lufthansa авиакомпанияси ушбу рейсларга талабнинг сезиларли даражада пасайганлигини таъкидлади.
Бундан ташқари, American Airlines мижозларга Пекин, Шанхай ва Гонконгга парвозлар учун олинган чипталарни бепул ўзгартиришга рухсат берди. Шунингдек, Сингапурнинг Scoot лоукостери ва Малайзиянинг AirAsia компаниясининг Хитойга авиақатновлари тўхтатилди.
Хитойликлар орасида Европа Иттифоқи ва Японияга учиш учун талаб кўп бўладиган Россиянинг Ural Airlines авиакомпанияси мазкур рейсларни бекор қилди.
29 январь ҳолатига кўра, янги коронавирусни 6 мингдан ортиқ одам юқтирган. Касалликдан вафот этганлар сони 132 кишидан ошди. ХХР Миллий соғлиқни сақлаш комиссиясининг маълумотларига кўра, қарийб 60 минг киши назорат остида турибди. БААда илк коронавирус билан касалланиш ҳолати қайд этилди
Қозоғистон хитойликларга виза беришни тўхтатди. 3 февралдан Қозоғистон ва Хитой ўртасида авиақатновлар тўхтатилади.Аввалроқ АҚШ касаллик ўчоғи бўлган Хитойнинг Ухань шаҳридан ўз фуқароларини эвакуация қилган эди. Япония ҳам эвакуацияни амалга оширди ва Ухандан ўз фуқароларини олиб чиқиб кетиш учун яна 2 та самолёт жўнатишни режалаштирмоқда. Шунингдек, Австралия ҳам Ухандаги ўз фуқароларини эвакуация қилишни режалаштирмоқда.
Ўзбекистон бош вазири Абдулла Арипов 28 январь, сешанба куни коронавирус бўйича йиғилиш ўтказган. Ўзбекистон Ташқи ишлар вазирлиги фуқароларга Хитойга хизмат, туристик ва бошқа мақсадларда ташриф буюришдан тийилиб туришни тавсия қилмоқда.
Изоҳ (0)