Австралия ҳукумати коронавирус қайд этилган Хубэй провинциясидан ўз фуқароларини олиб чиқиб кетишга ваъда берди. Бироқ улар аввал мамлакат чегарасидан бир неча минг километр узоқликдаги Рождество оролига олиб борилади, деб хабар берди «РБК».
Мазкур баёнотни Австралия ҳукумати раҳбари Скотт Моррисон билдирган бўлиб, бу борада Хитой ҳукумати билан музокаралар ўтказган. Унинг сўзларига кўра, изоляция сабаб Ухань шаҳри ва бутун Хубэй провинциясида Австралия фуқаролари қолиб кетган. Гап 600 га яқин Австралия, шунингдек, Янги Зеландия ва Тинч океанидаги бошқа давлатлар аҳолиси ҳақида кетмоқда.
Австралиядан 1 500 километр узоқликда жойлашган Рождество оролида карантин зонаси ташкил этилади. Агарда уларда коронавирус аниқланмаса, тахминан 14 кун ўтгач, фуқаролар Австралияга қайтиши мумкин бўлади.
Ҳозирда Рождество оролида Австралияга келишни истаган ноқонуний муҳожирларни сақлаш маркази жойлашган.
Сўнгги маълумотларга кўра, коронавирус билан касалланганлар сони 6 минг кишидан ошиб кетган. Аввалроқ Япония ҳам Ухандан 200 нафарга яқин фуқаросини эвакуация қилишини маълум қилганди.
Ўзбекистонда ҳозирча коронавирус билан касалланиш ҳолатлари расман қайд этилгани йўқ. Мамлакат аэропортларида касалликка қарши хавфсизлик чоралари кўрилган, хусусан, куни кеча Хитойдан қайтариб олиб келинган ўзбекистонлик талабалар аэропортнинг ўзидаёқ жиддий текширувдан ўтказилгани ҳақида хабар берилган эди.
Изоҳ (0)