Россия президенти Владимир Путин Чувашистон раҳбари Михаил Игнатьевни «ишончни йўқотгани муносабати билан» лавозимидан озод қилди. Бу ҳақда Meduza хабар бермоқда.
«Справедливая Россия» партиясидан Россия Давлат думаси (парламент қуйи палатаси)га сайланган, палатанинг миллатлар ишлари бўйича қўмитаси раиси Олег Николаев Чувашистон раҳбари вазифасини вақтинча бажарувчи этиб тайинланган.
Михаил Игнатьев 2010 йил июлидан бери Чувашистонга раҳбарлик қилиб келаётган эди.
Игнатьев январь ойи ўрталарида, матбуотдаги буюртма материаллар ҳақида гапираркан, журналист ва блогерларнинг «суробини тўғрилаб қўйиш» кераклигини таъкидлаган эди. 23 январь, пайшанба куни эса янги ўт ўчириш машиналарининг калитларини топшириш маросимида ФВВ ходимини калитни олиш учун бир неча бор сакрашга мажбур қилган эди.
https://twitter.com/luchinaleks/status/1220442546075328527
Шундан сўнг, Игнатьев 28 январь, сешанба куни Россияда ҳукмрон «Единая Россия» партияси сафидан чиқарилгани маълум бўлди. Партия бош кенгаши котиби Андрей Турчак «Единая Россия» аъзолари Игнатьев ортиқ Чувашистонга раҳбарлик қилмаслиги керак, деган фикрда эканлигини маълум қилган эди.
Россияда «ишончни йўқотгани муносабати» деган ифода билан бирор бир ҳудуд раҳбари сўнгги бор 2017 йил апрелида ишдан олинган эди. Ўшанда 140 миллион рубль миқдорида пора олганликда айбланган Удмуртистон раҳбари Александр Соловьев лавозимидан айрилган эди.
Олег Николаев асли чувашистонлик бўлиб, 2015 йили Чувашистон раҳбарлиги учун сайловда 14,7 фоиз овоз олиб, иккинчи ўринни эгаллаган. Сайловда Михаил Игнатьев 65,5 фоиз овоз билан ғалаба қозонган эди.
Худди шу вақтда бошқа бир мамлакатда:
Изоҳ (0)