Ижтимоий тармоқларда тарқалган коронавирус инфекциясининг Ўзбекистонга кириб келганлиги, жумладан, Жиззах ва Бухоро вилоятларида тарқалганлиги ҳақидаги хабарлар ҳақиқатга мутлақо зид, дейилади ССВ Жамоатчилик билан алоқалар бўлими берган хабарда.
Хабарда мева-сабзавотлар, жумладан, банандан ушбу вирус юқиши мумкинлиги ҳақидаги миш-мишлар юзасидан ҳам маълумот берилган.
Соғлиқни сақлаш вазирлиги ҳузуридаги Санитария-эпидемиологик осойишталик агентлиги мутахассиси Қамриддин Боқиевнинг таъкидлашича, Ўзбекистонга хориждан кириб келган мева-сабзавотлар, хусусан, бананлар Вазирлар Маҳкамасининг сертификатлаштириш тартибига оид 318-сонли қарорига асосан текширувдан ўтказилади. Биринчи навбатда, Вазирлар Маҳкамаси ҳузуридаги Ўсимликлар карантини инспекцияси томонидан фитосанитария хулосаси берилади. Кейин Соғлиқни сақлаш вазирлиги ҳузуридаги Санитария-эпидемиологик осойишталик агентлиги таркибидаги Санитар-эпидемиологик хулосалар бериш бўлимларида хавфсизлик кўрсаткичлари бўйича текширилиб, санитар-эпидемиологик хулоса тақдим этилади. Шундан сўнг «Ўзстандарт» агентлигидан мувофиқлик сертификати олингач, хориждан келтирилган мева-сабзавотлар сотувига рухсат берилади.Коронавирус мева-сабзавотлардан юқиши мумкинми?«Хитойдаги хавотирли эпидемик вазиятдан келиб чиққан ҳолда, қатор озиқ-овқатлар, жумладан, мева-сабзавотлар бўйича ҳам турли текширувлар олиб бориляпти. Лекин бу илмий жиҳатдан ҳали исботланмаган. Айни пайтда коронавирус юқишига турли ҳайвонлар ва денгиз маҳсулотлари сабаб бўлаётгани тахмин қилинмоқда. Аммо айнан қайси биридан юқиши мумкинлиги ҳақида ҳам аниқ тўхтамга келингани йўқ. Умуман олганда, мева-сабзавотларни ювмасдан ейиш қайсидир касалликлар келиб чиқишига сабаб бўлиши эҳтимоли бор. Бироқ айнан мева-сабзавотлар истеъмоли сабаб қандайдир вирус юқтириш ҳолатлари ҳали кузатилмаган», — дейди Қамриддин Боқиев.ССВ хабарида таъкидланишича, Ўзбекистонда ушбу коронавирус инфекциясига қарши барча керакли чоралар кўрилмоқда.
Мавзуга доир: Филиппин Хитой фуқароларига виза беришни тўхтатиб қўйди
Изоҳ (0)