Президент Шавкат Мирзиёев 28 январь, сешанба куни транспорт тизимини самарали ташкил этиш борасидаги устувор вазифалар муҳокамасига бағишланган йиғилиш ўтказди. Йиғилишда автомобиль ва жамоат транспорти соҳасида ҳам муайян камчиликлар борлиги кўрсатиб ўтилган.
Президент матбуот хизматининг ёзишича, аҳолига қулай ва сифатли автотранспорт хизмати кўрсатишни таъминлаш мақсадида йўналишлар учун очиқ тендерлар ўтказиш, жамоат транспортига оид тариф ва тартибларни қайта кўриб чиқиб, рақамлаштириш лозимлиги қайд этилган.
Йиғилишда Шавкат Мирзиёев Ўзбекистонда автомобиль йўлларининг ҳолатини яхшилаш масаласига ҳам тўхталиб, халқаро экспертларни жалб қилган ҳолда, тез фурсатларда Автомобиль йўлларини ривожлантириш стратегиясини ишлаб чиқиш бўйича кўрсатмалар берган.
Транспорт вазирлиги ҳузуридаги назорат органларининг иш услуби эскича экани кўрсатилиб, уларнинг фаолиятини замонавий талаблар асосида такомиллаштириш зарурлиги таъкидланган.
«Мутасаддилар йиғилишда қайд этилган муаммоларни ҳал этиш ва устувор вазифаларни бажариш режалари юзасидан ахборот берди», — дея қўшимча қилинган расмий ахборотда.
Изоҳ (0)