Ijtimoiy tarmoqlarda tarqalgan koronavirus infeksiyasining O‘zbekistonga kirib kelganligi, jumladan, Jizzax va Buxoro viloyatlarida tarqalganligi haqidagi xabarlar haqiqatga mutlaqo zid, deyiladi SSV Jamoatchilik bilan aloqalar bo‘limi bergan xabarda.
Xabarda meva-sabzavotlar, jumladan, banandan ushbu virus yuqishi mumkinligi haqidagi mish-mishlar yuzasidan ham ma’lumot berilgan.
Sog‘liqni saqlash vazirligi huzuridagi Sanitariya-epidemiologik osoyishtalik agentligi mutaxassisi Qamriddin Boqiyevning ta’kidlashicha, O‘zbekistonga xorijdan kirib kelgan meva-sabzavotlar, xususan, bananlar Vazirlar Mahkamasining sertifikatlashtirish tartibiga oid 318-sonli qaroriga asosan tekshiruvdan o‘tkaziladi. Birinchi navbatda, Vazirlar Mahkamasi huzuridagi O‘simliklar karantini inspeksiyasi tomonidan fitosanitariya xulosasi beriladi. Keyin Sog‘liqni saqlash vazirligi huzuridagi Sanitariya-epidemiologik osoyishtalik agentligi tarkibidagi Sanitar-epidemiologik xulosalar berish bo‘limlarida xavfsizlik ko‘rsatkichlari bo‘yicha tekshirilib, sanitar-epidemiologik xulosa taqdim etiladi. Shundan so‘ng “O‘zstandart” agentligidan muvofiqlik sertifikati olingach, xorijdan keltirilgan meva-sabzavotlar sotuviga ruxsat beriladi.Koronavirus meva-sabzavotlardan yuqishi mumkinmi?“Xitoydagi xavotirli epidemik vaziyatdan kelib chiqqan holda, qator oziq-ovqatlar, jumladan, meva-sabzavotlar bo‘yicha ham turli tekshiruvlar olib borilyapti. Lekin bu ilmiy jihatdan hali isbotlanmagan. Ayni paytda koronavirus yuqishiga turli hayvonlar va dengiz mahsulotlari sabab bo‘layotgani taxmin qilinmoqda. Ammo aynan qaysi biridan yuqishi mumkinligi haqida ham aniq to‘xtamga kelingani yo‘q. Umuman olganda, meva-sabzavotlarni yuvmasdan yeyish qaysidir kasalliklar kelib chiqishiga sabab bo‘lishi ehtimoli bor. Biroq aynan meva-sabzavotlar iste’moli sabab qandaydir virus yuqtirish holatlari hali kuzatilmagan”, — deydi Qamriddin Boqiyev.SSV xabarida ta’kidlanishicha, O‘zbekistonda ushbu koronavirus infeksiyasiga qarshi barcha kerakli choralar ko‘rilmoqda.
28-yanvar holatiga Xitoydagi koronavirus epidemiyasidan vafot etganlar soni 106 kishiga, yangi kasallanganlar soni 1300 nafarga yetgan. O‘zbekiston TIV odamlardan mish-mish tarqatmaslikni so‘rab, koronavirusdan himoyalanish bo‘yicha tavsiyalar bergan. Shuningdek, O‘zbekistonning koronavirus tufayli xitoylik sayyohlarning bir qismini yo‘qotishi mumkinligi xabar qilindi. Koronavirus tufayli Xitoy—O‘zbekiston aviaparvozlariga talab 5 baravar oshgan, Xitoyga bo‘lgan talab esa 3 barobar pasaygan.
Izoh (0)