Термизда Cobalt’ини жаримадан чиқариш учун 500 минг сўм пора берган ҳайдовчи энди беш йилга қамалиши мумкин

Термизда машинасини жарима майдончасидан чиқариб бериш эвазига ЙҲХБ ходимига пора таклиф қилган ҳайдовчи ушланди. Бу ҳақда Сурхондарё вилояти ИИБ Йўл ҳаракати хавфсизлиги бошқармаси матбуот хизмати «Дарё»га маълум қилди.

Хабар беришларича, 1974 йилда туғилган, Термиз туманида яшовчи ҳайдовчи Б.Б. Cobalt русумли автомашинасини бошқариб кетаётганида, Термиз шаҳрининг Р.Соатова кўчасида ЙПХ инспекторининг тўхташ ҳақидаги ишорасига бўйсунмай, ҳаракатланишда давом этган.

Бошқа уч инспектор — О.А., Э.А. ва А.Ш.нинг ўз вақтида кўрган тезкор чоралари натижасида «қочоқ ҳайдовчи» тез орада тўхтатилган. Унга нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) билан маъмурий баённома расмийлаштирилган, машина эса жарима майдончасига жойлаштирилган.

Шундан сўнг ҳайдовчи маъмурий хуқуқбузарлик тўғрисидаги баённомани бекор қилиш ва автоуловни жарима майдончасидан чиқариб бериш эвазига инспектор Э.А.га 500 минг сўм пора таклиф қилган. У шу куни соат 16:47 да Термиз шаҳрининг «Дўстлик» маҳалласида ўтказилган тезкор давомида Э.А.га 500 минг сўм пуни пора тарқиасида берган вақтида ашёвий далиллар билан ушланган.

Қўшимча қилишларича, ҳайдовчи Б.Б.га нисбатан 27 январь куни Жиноят кодексининг 211-моддаси 1-қисми (пора бериш) билан жиноят иши қўзғатилган. Ушбу модда бўйича айбдор деб топилган шахс базавий ҳисоблаш миқдори (БҲМ)нинг 50 баравари (11 150 000)дан 100 баравари (22 300 000 сўм)гача миқдорда жарима ёки 2 йилдан 5 йилгача озодликни чеклаш ёхуд 5 йилгача озодликдан маҳрум қилиш билан жазоланади.