Президент Шавкат Мирзиёев 28 январь, сешанба куни транспорт тизимини самарали ташкил этиш борасидаги устувор вазифалар муҳокамасига бағишланган йиғилиш ўтказди. Йиғилишда, хусусан, фуқаро авиацияси соҳасидаги ҳолат ҳам танқид қилинган.
«Миллий авиакомпания негизида ташкил этилган Uzbekistan Airways ва Uzbekistan Airports компаниялари мустақил ташкилотлар сифатида фаолиятини тўлиқ йўлга қўймагани сабабли ислоҳотлар натижаси кўринмаяпти», — дейилади Президент матбуот хизмати ахборотида.
Шунингдек, 2019 йили 4 та аэропортда «очиқ осмон» режими жорий этилиб, «бешинчи ҳаво эркинлиги» ўрнатилган эди, аммо ҳанузгача биронта ҳам хорижий авиакомпания жалб қилинмади.
«Бу ҳолат йўловчиларнинг асосли эътирозларига, бошқа хорижий авиакомпаниялар хизматидан фойдаланишига сабаб бўлмоқда», — дейилади Президент матбуот хизмати хабарида.
Шу боис йиғилишда Жаҳон банкининг тавсиялари асосида соҳада олиб борилаётган ислоҳотларни тўлиқ якунига етказиш ва рақобат муҳитини яратиш бўйича топшириқлар берилган.
Навоий ва Термиз халқаро аэропортларини юк ташиш хабига айлантириш мақсадида «очиқ осмон» режимини жорий этиб, хорижий юк ташувчи авиакомпанияларни кенг жалб қилиш вазифаси белгиланган.
«Янги авиакомпаниялар фаолияти учун шароит яратиш ва парвозлар географиясини янада кенгайтириш муҳимлиги таъкидланди», — дея қўшимча қилинган расмий ахборотда.
Изоҳ (0)