«Толибон» ҳаракати Афғонистон марказий қисмидаги Ғазни вилоятида самолётни уриб туширганини маълум қилди, дея хабар бермоқда Reuters агентлиги.
«Толибон» баёнотида таъкидланишича, самолётда америкалик ҳарбийлар, хусусан, юқори мартабали зобитлар бўлган. Самолётдагиларнинг бари ҳалок бўлган.
Аввалроқ Ғазни вилояти маъмурияти вакиллари Афғонистоннинг Ariana Airlines авиакомпаниясига тегишли йўловчи самолёти қулаганини маълум қилган эди. Бироқ авиакомпания вакиллари унинг 27 январда амалга оширилган ҳар иккала рейси белгиланган манзилларга муваффақиятли етиб боргани ҳақида баёнот берди.
Кейинроқ Ғазни вилояти маъмурияти ҳалокатга учраган самолёт хорижий компанияга тегишли экани ҳақида хабар тарқатди. Қулаган самолёт АҚШ ҳарбий-ҳаво кучларининг алоқа узели ва ретранслятори ҳисобланган Bombardier E-11A лайнери бўлиши мумкин, деган тахминлар пайдо бўлди. Жумладан, Conflict Intelligence Team экспертлари, таъкидланишича, самолёт қулаган жойдан олинган видеони таҳлил қилиб, шундай хулосага келган. Видеонинг ҳақиқийлиги тасдиқланмаган.
AFGHANISTAN: Airliner crash originally reported by Afghan media now appears to be a USAF aircraft. Footage tweeted by @TGhazniwal clearly shows the USAF logo on the fuselage. pic.twitter.com/KVeeKVYbot
— Conflict News (@Conflicts) January 27, 2020
Айни вақтда Кобулдаги юқори мартабали ҳарбий манбанинг Reuters’га маълум қилишича, Ғазнида қулаган самолёт на АҚШ ва на НАТОга тегишли.
АҚШ Қуролли Кучлари Марказий қўмондонлиги расмий вакили Бет Риорданнинг Associated Press’га маълум қилишича, америкалик ҳарбий экспертлар Афғонистонда самолёт қулагани ҳақидаги хабарларни текширмоқда. Айни вақтда у қулаган самолёт айнан кимга тегишли экани номаълумлигини қайд этиб ўтди. Риордан «Толибон» баёнотини изоҳлашдан бош тортди.
Изоҳ (0)