2020 йил 25 январь куни Америкадаги бир нечта ОАВ, жумладан, Associated Press агентлиги АҚШ президенти иштирокидаги бир ярим соатлик видеони эълон қилди. Унда 2018 йил апрель ойида Вашингтондаги Trump Hotel’да ўтган тушлик акс этган. Ёзувда Дональд Трамп ўз адвокати Рудольф Жулианининг ҳамкори Лев Парнас билан суҳбатда Украинадаги Америка элчиси Мари Йовановични зудлик билан чақириб олишни талаб қилган. Ушбу гапларгача Парнас президентга Йовановичнинг Киевда тез орада Трампга нисбатан импичмент эълон қилиниши ҳақида гап тарқатиб юрганлигини айтган. Тахминларга кўра, Трамп Йовановичнинг кимлиги ҳақида маълумотга эга бўлмаган ва ушбу хабарга кескин муносабат билдириб, Парнасга жавоб тариқасида:
«Ундан қутулинг! Эртагаёқ! Буни қандай қилишингиз мени қизиқтирмайди», – деган.
Видеонинг Жулианининг бошқа бир ҳамкори Игор Фруман томонидан тасвирга олингани тахмин қилинмоқда. Келиб чиқиши Собиқ иттифоқ мамлакатларига бориб тақалувчи америкалик икки бизнесмен Парнас ва Фруман 2019 йил октябрь ойида ҳибсга олинган ва айни вақтда Республикачилар партиясининг сайловолди фондига қилинган хайрия пуллари ҳақидаги маълумотларни қалбакилаштиришга алоқадорликда гумон қилиниб, терговга жалб этилган.
Видео Дональд Трампга импичмент эълон қилинаётгани туфайли ошкор этилди. АҚШ сенати 2019 йил декабрь ойида вакиллар палатаси маъқуллаган импичментни муҳокама қилмоқда. Трамп ўз ваколатини суиистеъмол қилганликда ва АҚШ сайловларига хориж давлатларининг аралашувига алоқадорликда айбланмоқда. Айбловлар Украинанинг Burisma нефть-газ компаниясига алоқадор, ушбу компания директорлар кенгаши таркибига Трампнинг 2020 йилдаги президентлик сайловларидаги асосий рақобатчиси Жо Байденнинг ўғли Хантер Байден бўлган. Трамп Украина президенти Владимир Зеленский билан 2019 йил июль ойида қилган суҳбатида Украинага кўрсатиладиган ҳарбий ёрдам учун АҚШнинг Хантер Байденга нисбатан жиноий иш очишида кўмак сўраб ҳамкасбига босим ўтказганликда айбланмоқда.
Трампнинг Украина ҳукумати билан музокараларидаги воситачиси унинг адвокати Рудольф Жулиани бўлган. Ўша вақтда АҚШнинг Украинадаги элчиси бўлган Мари Йованович ушбу ҳаракатларга кескин қаршилик кўрсатган. Видеода эълон қилинган суҳбатдан бир йил ўтиб, 2019 йил баҳорида Йованович АҚШнинг Украинадаги элчиси лавозимидан чақириб олинди. Йованович вакиллар палатасида импичмент бўйича эшитувлар вақтида Украинада Трамп ҳақида салбий фикрлар айтмагани, лекин АҚШ давлат департаменти хавфсизлик нуқтаи назаридан уни мамлакатга чақириб олганини айтган.
Изоҳ (0)