“Tolibon” harakati Afg‘oniston markaziy qismidagi G‘azni viloyatida samolyotni urib tushirganini ma’lum qildi, deya xabar bermoqda Reuters agentligi.
“Tolibon” bayonotida ta’kidlanishicha, samolyotda amerikalik harbiylar, xususan, yuqori martabali zobitlar bo‘lgan. Samolyotdagilarning bari halok bo‘lgan.
Avvalroq G‘azni viloyati ma’muriyati vakillari Afg‘onistonning Ariana Airlines aviakompaniyasiga tegishli yo‘lovchi samolyoti qulaganini ma’lum qilgan edi. Biroq aviakompaniya vakillari uning 27-yanvarda amalga oshirilgan har ikkala reysi belgilangan manzillarga muvaffaqiyatli yetib borgani haqida bayonot berdi.
Keyinroq G‘azni viloyati ma’muriyati halokatga uchragan samolyot xorijiy kompaniyaga tegishli ekani haqida xabar tarqatdi. Qulagan samolyot AQSh harbiy-havo kuchlarining aloqa uzeli va retranslyatori hisoblangan Bombardier E-11A layneri bo‘lishi mumkin, degan taxminlar paydo bo‘ldi. Jumladan, Conflict Intelligence Team ekspertlari, ta’kidlanishicha, samolyot qulagan joydan olingan videoni tahlil qilib, shunday xulosaga kelgan. Videoning haqiqiyligi tasdiqlanmagan.
AFGHANISTAN: Airliner crash originally reported by Afghan media now appears to be a USAF aircraft. Footage tweeted by @TGhazniwal clearly shows the USAF logo on the fuselage. pic.twitter.com/KVeeKVYbot
— Conflict News (@Conflicts) January 27, 2020
Ayni vaqtda Kobuldagi yuqori martabali harbiy manbaning Reuters’ga ma’lum qilishicha, G‘aznida qulagan samolyot na AQSh va na NATOga tegishli.
AQSh Qurolli Kuchlari Markaziy qo‘mondonligi rasmiy vakili Bet Riordanning Associated Press’ga ma’lum qilishicha, amerikalik harbiy ekspertlar Afg‘onistonda samolyot qulagani haqidagi xabarlarni tekshirmoqda. Ayni vaqtda u qulagan samolyot aynan kimga tegishli ekani noma’lumligini qayd etib o‘tdi. Riordan “Tolibon” bayonotini izohlashdan bosh tortdi.
Izoh (0)