Американинг Microsoft компанияси асосчиси Билл Гейтс Хитойдаги янги коронавирус билан курашиш жараёнини қўллаб-қувватлаш учун ўз хайрия жамғармасидан беш миллион доллар ажратди. Бу ҳақда «ТАСС» хабар берди.
Билл ва Мелинда Гейтс жамғармаси ушбу масала бўйича хитойлик ҳамкорлар — пневмонияни бартараф этиш фаолиятида иштирок этадиган хусусий ва жамоат ташкилотлари билан фаол ҳамкорлик қилмоқда.
Ажратилган маблағлар инфекцияни юқтирганларни аниқлаш, уларни карантин ва даволаш учун жойлаштириш ва вирусга қарши эмлашни жадал ривожлантириш учун ишлатилади.
«Биз ушбу касалликнинг тарқалишидан чуқур ташвишдамиз ва пневмонияга қарши курашда биринчи ўринда турувчи инсонларга самимий ҳурмат билдирамиз», — деди Гейтс жамғармасининг Хитой филиали директори Ли Ино.
Унинг сўзларига кўра, хайрия ташкилоти Африка мамлакатларига қитъада янги турдаги пневмония тарқалиш хавфини назорат қилиш ва минималлаштириш бўйича профилактик чора-тадбирларни амалга оширишда ёрдам бериш учун ҳам 5 миллион доллар ажратади.
Эслатиб ўтамиз, Хитойдаги коронавирус қурбонлари сони 80 кишига етди. Мамлакатда коронавируснинг биринчи ташувчиси ёввойи ҳайвонлар бўлгани эълон қилинди.
Бугун, 27 январь куни, Бутунжаҳон соғлиқни сақлаш ташкилоти бош директори коронавирусни муҳокама қилиш учун Хитойга йўл олди.
АҚШда ҳам коронавирус билан касалланган бешта ҳолат аниқланди. Франция ва Япония Ухань шаҳридан ўз фуқароларини олиб чиқиб кетаётганини маълум қилди.
Мавзуга доир:
- Хитойдаги коронавирус қурбонлари сони 80 кишига етди
- Хитойда коронавируснинг биринчи ташувчиси ёввойи ҳайвонлар бўлгани эълон қилинди
- Бутунжаҳон соғлиқни сақлаш ташкилоти бош директори коронавирусни муҳокама қилиш учун Хитойга йўл олди
- Хитой ҳукумати эпидемия сабаб Янги йил таътилларини узайтиради
- Хитойда тарқалган коронавирус ҳақида билиш зарур бўлган маълумотлар
Изоҳ (0)