Шавкат Мирзиёев 2020 йилни «Илм-маърифат ва рақамли иқтисодиётни ривожлантириш йили» деб эълон қилди

Президент Шавкат Мирзиёев 2020 йилга «Илм-маърифат ва рақамли иқтисодиётни ривожлантириш йили» деб ном беришни таклиф қилди. Давлат раҳбари бу ҳақда 24 январь куни Олий Мажлисга Мурожаатномаси вақтида айтиб ўтди.

Шавкат Мирзиёевнинг таъкидлашича, Ўзбекистон рақамли технологиялар соҳасида жуда орқада қолган.

«Аксарият вазирлик ва идоралар раҳбарлари ахборот технологияларидан жуда йироқда — буни рост-рўй айтиш керак. Лекин бундай раҳбарларга — у ҳоким бўладими, вазир бўладими — эртанги кунда ўрин йўқ. Шуни ҳамма билиши керак. Қанчалик қийин бўлмасин, бу ишга бугун киришмасак, кейин кеч бўлади», — деди Президент. Давлат раҳбарининг алоҳида таъкидлашича, рақамли иқтисодиётга фаол ўтиш келгуси беш йилда энг устувор вазифалардан бири бўлади.

«Рақамли технологиялар нафақат маҳсулот ва хизматлар сифатини оширади, балки ортиқча харажатларни камайтиради. Қолаверса, бу коррупцияга қарши самарали воситадир. Бу барчамиз теран англаб олишимиз даркор. Давлат бошқаруви ва ижтимоий соҳада ҳам рақамли технологияларни кенг жорий этиб, натижадорликни ошириш, бир сўз билан айтганда одамлар турмушини яхшилаш мумкин», — деди Шавкат Мирзиёев.

Шу муносабат билан, Президент Ўзбекистонда «илм-фан янада равнақ топиши, рақобатбардош иқтисодиётни шакллантириш борасида бошлаган ишларимизни давом эттириш мақсадида» 2020 йилга «Илм-маърифат ва рақамли иқтисодиётни ривожлантириш йили» деб ном беришни таклиф қилди. Таклиф тадбирга йиғилганлар томонидан гулдурос қарсаклар билан қўллаб-қувватланди. Президент бунинг учун миннатдорлик билдирди.