Миллиардер Жорж Сорос Трамп ва Facebook ўртасидаги «келишув» ҳақида сўзлаб берди

Facebook АҚШ президенти Дональд Трампга қайта сайланишига ёрдам беради. Бу ҳақда 89 ёшли миллиардер Жорж Сороснинг сўзларига асосланиб, Meduza хабар берди.

«Ўйлашимча, Трамп ва Facebook норасмий келишув устида ишламоқда. Facebook Трампнинг қайта сайланишини таъминлайди, Трамп эса Facebook’ни ҳимоя қилади», — дейди Сорос.

Сорос ўз фикрини асослаш учун ҳеч қандай далил келтирмаган. Facebook вакили эса Сороснинг сўзларини «шунчаки нотўғри» деб атади.

Қайд этилишича, турли мамлакатлар ҳукуматлари сўнгги вақтда Facebook фаолиятини синчковлик билан кузатмоқда. Бунга эса АҚШнинг фикрича, Дональд Трампнинг сайловда ғолиб бўлиши учун Россия томонидан Facebook’да берилган яширин реклама кампанияси сабаб бўлган.

Facebook’ни 2016 йилда тармоқда тарқалган фейк хабарларни блокламасдан, бунинг ортидан президентлик сайловларида Трампнинг ғолиб бўлишига шароит яратиб берганликда айблашган эди.

2017 йилда Facebook россиялик «троллар фабрикаси» фаолияти туфайли сиёсий реклама билан ишлаш сиёсатини ўзгартиришини маълум қилган эди.

Ижтимоий тармоқ вакилларининг фикрича, реклама кампанияси Россия ҳудудидан жойлаштирилган. Реклама 470 та фейк аккаунтдан қўйилган. Эълонларга 100 минг доллар сарфланган.

Twitter, Google ва Spotify 2019 йилда ўз платформаларида сиёсий рекламани чеклаб қўйди.

Facebook бундай қилмасдан, фойдаланувчиларга ўзлари кўраётган эълонлар устидан назорат ўрнатиш учун кўпроқ имкон беришини маълум қилганди. Компания янги функцияни 2020 йилнинг биринчи чорагида ишга туширишини маълум қилган эди.