Олий Мажлис Қонунчилик палатасининг барча қўмиталарида янги таркибдаги ҳукумат аъзолигига номзодларни кўриб чиқиш ва маъқуллаш масалалари муҳокама қилинмоқда.
ЎзАнинг хабар беришича, Очилбой Раматов Ўзбекистон Бош вазирининг биринчи ўринбосари лавозимига номзод сифатида кўрсатилди. Азиз Абдуҳакимов эса Ўзбекистон Бош вазирининг ўринбосари — Туризмни ривожлантириш бўйича давлат қўмитаси раиси лавозимига номзод сифатида кўрсатилди.
Эътиборли томони, бу янги лавозим бўлиб, Туризмни ривожлантириш қўмитаси раиси бир пайтнинг ўзида Бош вазир ўринбосари ҳам бўлади. Азиз Абдуҳакимов Бош вазир ўринбосари бўлишидан олдин айнан Туризм қўмитаси раиси бўлиб ишлаган эди.
«Gazeta.uz»нинг ёзишича, Транспорт вазири лавозимига бош вазир томонидан Элёр Ғаниев номзоди илгари сурилган. У айни пайтда ҳукумат раҳбарининг ўринбосари мақомида фаолият юритаётганди. Шу билан бирга, Ғаниевнинг бош вазир ўринбосари сифатида лавозимни сақлаб қолиш масаласи очиқ қолмоқда.
Шунингдек, Сенат қўмита раиси этиб сайланган, шу пайтга қадар маданият вазири бўлган Бахтиёр Сайфуллаев ўрнини вазирнинг биринчи ўринбосари Озодбек Назарбеков эгаллаши кутилмоқда.
Қолган барча вазирлар ўз лавозимида қолиши айтилмоқда.
Изоҳ (0)