Германиянинг Deutsche Bahn компанияси Ўзбекистонда темирйўл транспортини ривожлантиришга ёрдам беради

Германиянинг асосий темирйўл оператори — Deutsche Bahn «Ўзбекистон темир йўллари»ни ислоҳ қилишга ёрдам бериши ҳақида хабар берилган эди.

Кеча, 21 январь куни Транспорт вазирлигида Deutsche Bahn компаниянинг МДҲ бўйича директори Винсент ван Хаутен бошчилигидаги делегация вакиллари ва транспорт вазирининг биринчи ўринбосари Илҳом Маҳкамов иштирокида музокаралар бўлиб ўтди.

Вазирлик матбуот хизматининг хабар беришича, унда жамоат транспорти соҳасида оператив бошқарув тизимини жорий этиш, хусусан, «Ўзбекистон темир йўллари» АЖ фаолиятини такомиллаштириш, юк ва йўловчи ташувларини ҳамда мамлакатимиз транзит ва логистика потенциалини ривожлантириш масалалари юзасидан фикр алмашилди.

Deutsche Bahn компанияси экспертларини жалб этган ҳолда ҳамкорликнинг бошланғич фазасида ишларни йўлга қўйиш бўйича лойиҳа офиси ишини ташкил этишга келишиб олинди.

Учрашув якунида Транспорт вазирлиги ва Deutsche Bahn компанияси ўртасида ўзаро ҳамкорлик қилиш бўйича меморандум имзоланди.