Oliy Majlis Qonunchilik palatasining barcha qo‘mitalarida yangi tarkibdagi hukumat a’zoligiga nomzodlarni ko‘rib chiqish va ma’qullash masalalari muhokama qilinmoqda.
O‘zAning xabar berishicha, Ochilboy Ramatov O‘zbekiston Bosh vazirining birinchi o‘rinbosari lavozimiga nomzod sifatida ko‘rsatildi. Aziz Abduhakimov esa O‘zbekiston Bosh vazirining o‘rinbosari — Turizmni rivojlantirish bo‘yicha davlat qo‘mitasi raisi lavozimiga nomzod sifatida ko‘rsatildi.
E’tiborli tomoni, bu yangi lavozim bo‘lib, Turizmni rivojlantirish qo‘mitasi raisi bir paytning o‘zida Bosh vazir o‘rinbosari ham bo‘ladi. Aziz Abduhakimov Bosh vazir o‘rinbosari bo‘lishidan oldin aynan Turizm qo‘mitasi raisi bo‘lib ishlagan edi.
“Gazeta.uz”ning yozishicha, Transport vaziri lavozimiga bosh vazir tomonidan Elyor G‘aniyev nomzodi ilgari surilgan. U ayni paytda hukumat rahbarining o‘rinbosari maqomida faoliyat yuritayotgandi. Shu bilan birga, G‘aniyevning bosh vazir o‘rinbosari sifatida lavozimni saqlab qolish masalasi ochiq qolmoqda.
Shuningdek, Senat qo‘mita raisi etib saylangan, shu paytga qadar madaniyat vaziri bo‘lgan Baxtiyor Sayfullayev o‘rnini vazirning birinchi o‘rinbosari Ozodbek Nazarbekov egallashi kutilmoqda.
Qolgan barcha vazirlar o‘z lavozimida qolishi aytilmoqda.
Izoh (0)