“Bu yangi parlament yuzini ko‘rsatadigan mansab bo‘lishi kerak”. Akmal Saidov ishonch uchun Prezidentga minnatdorchilik bildirdi

Bugun, 20-yanvar kuni Oliy Majlis Qonunchilik palatasining saylovdan keyingi ilk majlisi bo‘lib o‘tdi.

Qonunchilik palatasi tarixida ilk bor Spikerning birinchi o‘rinbosari lavozimi joriy qilinib, unga “Milliy tiklanish” partiyasi a’zosi Akmal Saidov saylandi. Majlisda qatnashayotgan 150 nafar deputatdan 147 nafari salkam 20 yillik deputatlik tajribasiga ega Akmal Saidov nomzodini yoqlab ovoz bergan.

“Daryo” muxbiri Mirolim Isajonovning xabar berishicha, Akmal Saidov majlisda nutq so‘zlab, bildirilgan ishonch uchun Shavkat Mirziyoyevga minnatdorchilik bildirdi:

“Spikerning birinchi o‘rinbosari lavozimi yangi parlamentning yuzini ko‘rsatadigan mansablardan biri bo‘lishi kerak, deb qabul qildim. Avvalambor, ishonchingiz uchun deputatlarga ham, sizga ham rahmat. Mana shu yo‘nalishda salohiyatimni imkon boricha sarflab, sadoqat bilan xizmat qilishga harakat qilaman.

Bo‘lib o‘tgan saylovlar O‘zbekiston uchun, avvalambor, xalqimiz oldida, jahon hamjamiyati oldida katta siyosiy imtihon vazifasini o‘tadi.

Saylovlardan keyin men ko‘p ma’lumotlarni o‘rgandim. Yevropada xavfsizlik va hamkorlik tashkiloti 1992-yildan beri 50 dan ortiq davlatlarda kuzatuv o‘tkazgan, monitoring 400 dan ortiq shunday kuzatuvlar bo‘lgan. O‘zbekistonda 8 marotaba kuzatuvchilik qilishgan. Jumladan, Prezident saylovlarida 3 marta, parlament saylovlarida 5 marta. MDH mamlakatlari ichida O‘zbekistonga berilgan oxirgi baho eng yuqorisi bo‘ldi. Men hammasini qiyoslab chiqib, xulosa qildimki, O‘zbekistondagi oxirgi saylovlar atrofdagi ko‘pgina davlatlar uchun, YeXHT uchun ham namuna bo‘ladigan saylov bo‘ldi”.