Хитойнинг Ухан шаҳрида коронавируслар оиласига мансуб номаълум вирус сабабли иккинчи киши вафот этди. Бу ҳақда Meduza хабар берди.
Хабар берилишича, 15 январь куни 69 ёшли эркак пневмониядан вафот этган. Эркак бундан бир неча кун олдин буйрак ишининг бузилиши ва бошқа аъзоларнинг жиддий шикастланиши билан касалхонага ётқизилган.
11 январь куни мазкур касалликнинг биринчи қурбони қайд этилган, 61 ёшли эркак вафот этган.
Номаълум вирус сабабли тарқалган пневмония тўлқини декабрь ойининг охирида Ухан шаҳрида юзага келган. Шу кунга қадар вирус билан зараланиш бўйича 41 та ҳолат қайд этилган.Январь ойининг ўртасида Таиланд ва Японияда мазкур вирусдан зарарланиш бўйича дастлабки ҳолатлар қайд этилган. Икки ҳолатда ҳам касалланганлар яқинда Ухан шаҳрида бўлган хитойликлар ҳисобланади.«Коммерсантъ»нинг ёзишича, айни пайтда 12 кишига касалхонадан уйига жавоб берилган, беш киши оғир аҳволда қолмоқда. Қолганларнинг ҳолати барқарор деб баҳоланмоқда. Беморлар билан яқин алоқада бўлган яна 119 киши шифокорлар назорати остида қолмоқда.
Аввалроқ, Ўзбекистон Ташқи ишлар вазирлиги Хитойга бормоқчи бўлган фуқароларни мазкур касаллик хавфидан огоҳлантирган эди.
Изоҳ (0)