Друлович БААга қарши баҳс олдидан: «Буёғига ўйинларни кичик деталлар ҳал қилиб қўяди»

Таиланд мезбонлик қилаётган 23 ёшгача бўлган футболчилар ўртасидаги Осиё Чемпионати—2020 мусобақасининг чорак финалида Ўзбекистон олимпия терма жамоаси 19 январь, якшанба куни БААга қарши баҳс олиб боради.

Мазкур учрашув олдидан 18 январь, шанба куни икки жамоа бош мураббийлари — Любинко Друлович ва Матсэй Скорня иштирокидаги матбуот анжумани ўтказилди.

Бизни катта ўйин кутяпти. Ўртоқлик ўйинида БАА жуда кучли ҳаракат қилган ва ғалаба қозонганди. Рақибга нисбатан тикланишга вақтимиз кўпроқ эди. Биз орзуйимиз сари интилишда давом этамиз. Ният — Олимпиада ўйинлари.

Бизда аввалги мусобақада иштирок этган бир неча футболчи бор. 8 нафар. Уларнинг тажрибаси кўпроқ. Бироқ бу сафарги мусобақа Олимпиада учун. Ўйинлар оғир бўляпти, ҳаммада мотивация юқори. Чемпионликни ҳимоя қилиш осон эмас. Биз албатта ўз олдимизга энг юқори мақсадларни қўйганмиз.

Жанубий Кореяга қарши ўйиндан кейин биз мусобақа етакчилари билан ўйнадик ва гуруҳдан чиқдик, деб айтдим. Бу эса осон кечгани йўқ. Биз бу сафар кучимизни тўлиқ тиклаб олишга ишончим комил. БААга қарши учрашувгача жисмоний ҳолатимиз яхшиланади.

Ҳамкасбим айтганидек, ростдан ҳам ўйинлар жуда кескин бўлди. Битта гол фарқи кўп учрашув масаласини ҳал қилди. Япония, Эрон, Ироқ, Қатар каби кучлилар эса гуруҳда қийинчиликка дуч келди. Айни вақтда мусобақада 8 та энг кучли терма жамоа қолди. Буёғига ўйинларни кичик деталлар ҳал қилиб қўяди.

Любинко Друлович, Ўзбекистон U23 бош мураббийи

Биз учун Ўзбекистонга қарши ўйин бу — топ даражадаги баҳс. Рақиб кучини биламиз, лекин биз  ўйинга тайёрмиз. Тайёргарлик яхши кетяпти. Ўзбекистон биздан бир кун кўп дам олиш имкониятига эга бўлди. Ўзбекистон — фаворит.

Бизда ҳам таркибда катта мусобақалар тажрибасига эга ўйинчилар бор. Уларнинг фойдаси катта. Эртанги ўйин масаласини битта гол ҳал қилиши мумкин. Омадга ҳам кўп нарса боғлиқ.

Менинг фикримча, бу чемпионатда жамоалар даражаси бир бирига яқин. Гуруҳнинг ўзида кучли ўйинлар бўлди. Япония чиқиб кетди, масалан. Ёки Қатар бўш ўйнади. Ўзбекистонга қарши ўйнашимиз мумкинлигини тахмин қилиш мумкин эди. Жанубий Кореяни ҳам кузатдик. Бу гуруҳда шу икки жамоа чиқишини олдиндан башорат қилгандим.

Матсэй Скорня, БАА U23 бош мураббийи