Drulovich BAAga qarshi bahs oldidan: “Buyog‘iga o‘yinlarni kichik detallar hal qilib qo‘yadi”

Tailand mezbonlik qilayotgan 23 yoshgacha bo‘lgan futbolchilar o‘rtasidagi Osiyo Chempionati—2020 musobaqasining chorak finalida O‘zbekiston olimpiya terma jamoasi 19-yanvar, yakshanba kuni BAAga qarshi bahs olib boradi.

Mazkur uchrashuv oldidan 18-yanvar, shanba kuni ikki jamoa bosh murabbiylari — Lyubinko Drulovich va Matsey Skornya ishtirokidagi matbuot anjumani o‘tkazildi.

Bizni katta o‘yin kutyapti. O‘rtoqlik o‘yinida BAA juda kuchli harakat qilgan va g‘alaba qozongandi. Raqibga nisbatan tiklanishga vaqtimiz ko‘proq edi. Biz orzuyimiz sari intilishda davom etamiz. Niyat — Olimpiada o‘yinlari.

Bizda avvalgi musobaqada ishtirok etgan bir necha futbolchi bor. 8 nafar. Ularning tajribasi ko‘proq. Biroq bu safargi musobaqa Olimpiada uchun. O‘yinlar og‘ir bo‘lyapti, hammada motivatsiya yuqori. Chempionlikni himoya qilish oson emas. Biz albatta o‘z oldimizga eng yuqori maqsadlarni qo‘yganmiz.

Janubiy Koreyaga qarshi o‘yindan keyin biz musobaqa yetakchilari bilan o‘ynadik va guruhdan chiqdik, deb aytdim. Bu esa oson kechgani yo‘q. Biz bu safar kuchimizni to‘liq tiklab olishga ishonchim komil. BAAga qarshi uchrashuvgacha jismoniy holatimiz yaxshilanadi.

Hamkasbim aytganidek, rostdan ham o‘yinlar juda keskin bo‘ldi. Bitta gol farqi ko‘p uchrashuv masalasini hal qildi. Yaponiya, Eron, Iroq, Qatar kabi kuchlilar esa guruhda qiyinchilikka duch keldi. Ayni vaqtda musobaqada 8 ta eng kuchli terma jamoa qoldi. Buyog‘iga o‘yinlarni kichik detallar hal qilib qo‘yadi.

Lyubinko Drulovich, O‘zbekiston U23 bosh murabbiyi

Biz uchun O‘zbekistonga qarshi o‘yin bu — top darajadagi bahs. Raqib kuchini bilamiz, lekin biz  o‘yinga tayyormiz. Tayyorgarlik yaxshi ketyapti. O‘zbekiston bizdan bir kun ko‘p dam olish imkoniyatiga ega bo‘ldi. O‘zbekiston — favorit.

Bizda ham tarkibda katta musobaqalar tajribasiga ega o‘yinchilar bor. Ularning foydasi katta. Ertangi o‘yin masalasini bitta gol hal qilishi mumkin. Omadga ham ko‘p narsa bog‘liq.

Mening fikrimcha, bu chempionatda jamoalar darajasi bir biriga yaqin. Guruhning o‘zida kuchli o‘yinlar bo‘ldi. Yaponiya chiqib ketdi, masalan. Yoki Qatar bo‘sh o‘ynadi. O‘zbekistonga qarshi o‘ynashimiz mumkinligini taxmin qilish mumkin edi. Janubiy Koreyani ham kuzatdik. Bu guruhda shu ikki jamoa chiqishini oldindan bashorat qilgandim.

Matsey Skornya, BAA U23 bosh murabbiyi