Давлат молиявий назорати департаменти томонидан 2019 йилда 10 334 та молиявий назорат тадбирлари ўтказилди. Молия вазирлиги матбуот хизматининг хабар беришича, ҳисобот даврида асосий эътибор давлат бюджети маблағларини мақсадли ва қонун ҳужжатларига мувофиқ сарфланишига қаратилган.
Ўтказилган молиявий назорат тадбирларининг 8028 таси (78 фоиз)да 488,3 миллиард сўм миқдорида қонунбузилиш ҳолатлари ва бошқа хато ва камчиликлар аниқланиб, шундан 253,2 миллиард сўмни (52 фоиз) бюджет ва мақсадли жамғармалар ҳамда хўжалик субъектлари ҳисоб рақамларига тикланиши таъминланган.
Вазирлик хабарида айтилишича, 2019 йилда аниқланган бюджет интизомини бузилиш ҳолатлари вазирлик ва ҳудудлар кесими бўйича қуйидаги бўлди:
2019 йилда энг кўп аниқланган бюджет интизомини бузилиш ҳолатлари Халқ таълими вазирлиги тизимидаги муассасаларида 29,8 миллиард сўмни ташкил этиб, 2018 йилга нисбатан қонунбузилиш ҳолатлари 19 миллиард сўмга (2,7 марта) кўпайган.
Шунингдек, Олий ва ўрта махсус таълими вазирлиги тизими ташкилотларида аниқланган қонунбузилиш ҳолатлари 16,7 миллиард сўмни ташкил этиб, 2018 йилга нисбатан 10,1 миллиард сўмга (2,5 марта), Мактабгача таълим вазирлиги тизимидаги муассасаларида аниқланган қонунбузилиш ҳолатлари 8,3 миллиард сўмни ташкил этиб, 2018 йилга нисбатан 2,9 миллиард сўмга (1,5 марта), Маданият вазирлиги тизимидаги муассасаларида аниқланган қонунбузилиш ҳолатлари 7,8 миллиард сўмни ташкил этиб, 2018 йилга нисбатан 5,4 миллиард сўмга (3,3 марта) кўпайган.
Шу билан бирга, ҳисобот даврида Соғлиқни сақлаш вазирлиги тизимидаги муассасаларда аниқланган қонунбузилиш ҳолатлари 13,8 миллиард сўмни ташкил этиб, 2018 йилга нисбатан (17,1 миллиард сўм) камайган бўлса-да, йирик миқдорни ташкил этди.
Ҳисобот даврида аниқланган йирик миқдордаги молиявий хато ва камчиликлар Қашқадарё (18,7 миллиард сўм), Тошкент (17 миллиард сўм), Жиззах (16,9 миллиард сўм), Андижон (11,8 миллиард сўм), Сурхондарё (10,8 миллиард сўм), Самарқанд (10,2 миллиард сўм) вилоятларига ва Тошкент шаҳрига (10,8 миллиард сўм) тўғри келмоқда.
Изоҳ (0)