Январь ойи бошида ижтимоий тармоқларда шахсий фойдаланиш учун товарларни импорт қилишнинг янги тартиби жорий этилгандан сўнг божхона божлари миқдори ортгани ва чегараларда тирбандлик ва навбатлар пайдо бўлгани ҳақида хабарлар пайдо болди. Давлат божхона қўмитаси матбуот хизмати ушбу хабарларга муносабат билдирди.
Шундай хабарлардан бирида ўзини бухоролик ҳайдовчилар деб таништирган бир гуруҳ шахслар видеомурожаат йўллаб, янги тартибни бекор қилишни сўрайди.
Уларнинг сўзларига кўра ҳайдовчилар ўзлари учун эмас, ватандошларининг товарларини олиб кетаётган бўлган.
«Битта Бухоронинг ўзидан 500 нафар ҳайдовчи бир йилда 7 миллиард сўмгача пул тўлайди. Ҳеч қайси инвестор бунча харажат қилмайди», — дейилади видеомурожаатда.
Бироқ видеомурожаатда қандай тўловлар ҳақида гап кетаётганига аниқлик киритилмаган.
Шу билан бирга ижтимоий тармоқларда ва бир нечта янгиликлар сайтларида агар илгари бир машина юк учун бож миқдори 400 доллар бўлган бўлса, энди бу миқдор 20 марта кўпроқ 8000 долларни ташкил қилаётгани ҳақида хабарлар тарқалди.
Божхона қўмитаси хабарида айтилишича, Ўзбекистон Президентининг 2019 йил 7 ноябрдаги «Жисмоний шахслар томонидан шахсий эҳтиёжлари учун товарларни олиб ўтиш тартибини янада такомиллаштириш тўғрисида» ПҚ-4508-сон қарорига мувофиқ 2020 йил 1 январдан бошлаб, республикага кириб келаётган жисмоний шахсларнинг нотижорат мақсадлардаги товарлари божсиз олиб киришнинг чекланган меъёрларидан ортган ҳолатларда божхона тўловлари соддалаштирилган тартибда ундирилиши йўлга қўйилди.
Ҳозирги меъёрлар қуйидагича:
- 1000 АҚШ доллари — халқаро курьерлик жўнатмаларига кирадиган товарлар учун чорак мобайнида;
- 100 АҚШ доллари — халқаро почта жўнатмаларига кирадиган маҳсулотлар учун.
Қайд этилишича, тижорат мақсади учун олиб кирилаётган товарларни «ўз эҳтиёжим учун» деган важ билан олиб кириш ҳолатлари кўпаймоқда.
Шундай экан, товарлар сифат ва хавфсизлик бўйича мажбурий текширувлардан ўтказилиши лозим, дейилади хабарда.
Бундан ташқари, ягона божхона тўловининг жорий этилиши натижасида мазкур тартиблар нафақат соддалашди, балки сарфланадиган вақт бир неча баробарга қисқариб, ҳозирда ўртача 5-10 дақиқани ташкил қилмоқда.
Таъкидлаш жоизки, ягона божхона тўловини ундириш амалиёти Россия, Беларусь, Қозоғистон, Қирғизистон, Арманистон каби давлатларда кенг қўлланилмоқда. Жумладан, жисмоний шахслар томонидан олиб келинаётган товарлар учун 30%, лекин бир килограмм учун 4 АҚШ долларидан кам бўлмаган миқдорида ягона божхона тўлови жорий этилган.
Қўмита фуқароларга мурожаат учун «11-08» қисқа рақамли ишонч телефони ишлаётганни ҳам эслатиб ўтди.
Изоҳ (0)