Davlat moliyaviy nazorati departamenti tomonidan 2019-yilda 10 334 ta moliyaviy nazorat tadbirlari o‘tkazildi. Moliya vazirligi matbuot xizmatining xabar berishicha, hisobot davrida asosiy e’tibor davlat budjeti mablag‘larini maqsadli va qonun hujjatlariga muvofiq sarflanishiga qaratilgan.
O‘tkazilgan moliyaviy nazorat tadbirlarining 8028 tasi (78 foiz)da 488,3 milliard so‘m miqdorida qonunbuzilish holatlari va boshqa xato va kamchiliklar aniqlanib, shundan 253,2 milliard so‘mni (52 foiz) budjet va maqsadli jamg‘armalar hamda xo‘jalik subyektlari hisob raqamlariga tiklanishi ta’minlangan.
Vazirlik xabarida aytilishicha, 2019-yilda aniqlangan budjet intizomini buzilish holatlari vazirlik va hududlar kesimi bo‘yicha quyidagi bo‘ldi:
2019-yilda eng ko‘p aniqlangan budjet intizomini buzilish holatlari Xalq ta’limi vazirligi tizimidagi muassasalarida 29,8 milliard so‘mni tashkil etib, 2018-yilga nisbatan qonunbuzilish holatlari 19 milliard so‘mga (2,7 marta) ko‘paygan.
Shuningdek, Oliy va o‘rta maxsus ta’limi vazirligi tizimi tashkilotlarida aniqlangan qonunbuzilish holatlari 16,7 milliard so‘mni tashkil etib, 2018-yilga nisbatan 10,1 milliard so‘mga (2,5 marta), Maktabgacha ta’lim vazirligi tizimidagi muassasalarida aniqlangan qonunbuzilish holatlari 8,3 milliard so‘mni tashkil etib, 2018-yilga nisbatan 2,9 milliard so‘mga (1,5 marta), Madaniyat vazirligi tizimidagi muassasalarida aniqlangan qonunbuzilish holatlari 7,8 milliard so‘mni tashkil etib, 2018-yilga nisbatan 5,4 milliard so‘mga (3,3 marta) ko‘paygan.
Shu bilan birga, hisobot davrida Sog‘liqni saqlash vazirligi tizimidagi muassasalarda aniqlangan qonunbuzilish holatlari 13,8 milliard so‘mni tashkil etib, 2018-yilga nisbatan (17,1 milliard so‘m) kamaygan bo‘lsa-da, yirik miqdorni tashkil etdi.
Hisobot davrida aniqlangan yirik miqdordagi moliyaviy xato va kamchiliklar Qashqadaryo (18,7 milliard so‘m), Toshkent (17 milliard so‘m), Jizzax (16,9 milliard so‘m), Andijon (11,8 milliard so‘m), Surxondaryo (10,8 milliard so‘m), Samarqand (10,2 milliard so‘m) viloyatlariga va Toshkent shahriga (10,8 milliard so‘m) to‘g‘ri kelmoqda.
Izoh (0)