Интернет тармоғида бир гуруҳ Ўзбекистон фуқароларининг Андижон вилоятидаги хусусий бандлик агентлиги томонидан Россиянинг Сахалин вилоятига ишга жўнатилгани, меҳнат шароитлари ёмонлиги ва хусусий бандлик агентлиги томонидан алдангани баён этилган видео тарқалди.
Ташқи меҳнат миграцияси агентлиги ушбу хабар юзасидан баёнот берди. Қайд этилишича, агентликнинг Москвадаги ваколатхонаси Ташқи ишлар вазирлиги консуллик-ҳуқуқий департаменти билан биргаликда мазкур ҳолат юзасидан ўрганишлар олиб борди.
Ўрганишлар натижасидан маълум бўлишича, видеомурожаатда таъкидланганидек, Андижондаги хусусий бандлик агентлиги томонидан эмас, бошқа консалтинг фирма орқали 27 нафар фуқаро Россиянинг Сахалин вилоятига ишга кетган.
Уларга аввалдан бўлажак иш жойи хусусидаги маълумотлар тақдим этилган, бироқ у ердаги иш шароитларини кўргандан сўнг улар ишлашни рад этган ва иш берувчи томонидан тайёрланган патентларни олишдан бош тортган.
Таъкидланишича, Россияда таклиф қилинган иш осон бўлмаган. Иш берувчининг сўзларига кўра у консалтинг фирма билан тузилган шартнома шартларини бузмаган. Фуқароларда етарли даражада кўникма бўлмагани сабабли улар бир ой давомида бетон қуйиш билан шуғулланган ва бу орқали иш берувчи ишчиларга дастлабки касбий кўникмаларни берган.Ушбу фуқароларнинг 11 нафари, хусусан, видеомурожаат қилган фуқаро ҳозирги кунда Ўзбекистонга қайтиб келган, қолганлари эса Россияда вақтинчалик меҳнат фаолиятини амалга оширмоқда.
Изоҳ (0)