АҚШ Эронга қарши янги санкцияларни жорий қилди
АҚШ Эронга қарши янги санкцияларни жорий қилди. Дональд Трамп бу ҳақдаги тегишли қарорни имзолади, деб ёзмоқда Meduza.
Чекловлар Эрон иқтисодиётининг ишлаб чиқариш, енгил саноат, қурилиш ва кончилик соҳаларига нисбатан жорий қилинган. Санкциялар бирламчи ва иккиламчи бўлиб, мазкур соҳалардаги Эрон компаниялари билан бизнес юритган учинчи томонлар ҳам санкциялар остига тушади.
Шунингдек, АҚШ Эроннинг йирик темир ва пўлат ишлаб чиқарувчиларига қарши махсус санкциялар жорий қилган. Бундан ташқари, мамлакат раҳбариятининг саккиз нафар вакили шахсий чекловлар остига тушган.
Дональд Трамп Эронга қарши янги санкцияларни 8 январь куни Эроннинг Ироқдаги АҚШ ҳарбий базаларига берган зарбаларига жавобан эълон қилган.
АҚШ ва Эрон ўртасидаги кескинлик АҚШ томонидан Эроннинг энг нуфузли генерали Қосим Сулаймоний ўлдирилгач кучайди. Бунга жавобан Эрон 8 январь куни АҚШнинг Ироқда жойлашган иккита ҳарбий базасига ракета зарбалари берди.
Мавзуга доир: Эрон Трампнинг тинчликка чақириғига муносабат билдирди
